Текстот на резолуцијата за кој „воздржано“ гласаа САД и Русија, повикува на „безбедна и непречена испорака на хуманитарна помош за Газа“ и „создавање услови за одржлив прекин на непријателствата“, но не се повикува на прекин на огнот меѓу Израел и Хамас
По неколкудневни преговори, Советот за безбедност на Обединетите нации (ОН) денеска усвои резолуција со која се повикува на зголемена и забрзана испорака на хуманитарна помош за цивилите во Појасот Газа.
Текстот на резолуцијата повикува на „безбедна и непречена испорака на хуманитарна помош“. За брзо испорачување на помошта, резолуцијата, исто така, повикува и на „создавање услови за одржлив прекин на непријателствата“. Но, не се повикува на прекин на огнот меѓу Израел и Хамас.
Текстот на резолуцијата беше усвоен со 13 гласа „за“ и ниеден „против“. САД и Русија гласаа „воздржано“.
По гласањето, шефот на Обединетите нации, Антонио Гутереш рече дека вистинскиот проблем за напорите за помош на ОН е офанзивата на Израел, за која вели дека создала „масивни пречки“.
„Хуманитарниот прекин на огнот е единствениот начин да се започне задоволување на очајните потреби на луѓето во Газа и да се стави крај на нивниот тековен кошмар“,
додаде тој.
САД претходно гласаа против повиците за прекин на огнот во Појасот Газа на Генералното собрание на ОН, а ставија и вето на резолуцијата на Советот за безбедност која го вклучуваше зборот „прекин на огнот“ во текстот. Заменик-амбасадорот на САД во ОН, Роберт Вуд, тогаш пред Советот за безбедност изјави дека тоа е затоа што нацртот не ги спомнува нападите на Хамас на 7 октомври врз јужен Израел.
Извор: 360stepeni.mk
