Петти протест во Белград поради сомнежите на опозицијата за кражба на изборите во Србија

Организаторите на протестот побараа отворање на избирачките списоци и најавија поголем протест и блокади на улиците доколку тоа не се направи до понеделник

Протестите на кои повикува српската опозиција следат по парламентарните, покраинските и локалните избори во Србија на 17 декември на кои владејачката Српска напредна партија (СНС) прогласи победа на сите нивоа. Опозиционерите, пак, обвинуваат за изборни кражби, особено на изборите во Белград и бараат нивно поништување

Пред зградата на Републичката изборна комисија (РИК) во Белград вечерва се одржува петтиот по ред протест поради наводите за изборна кражба на изборите во Србија. Протестите се иницирани од српската опозициска коалиција „Србија против насилството“ која не ги признава резултатите од изборите и бара нивно поништување.

„Да живее изборната кражба“, „Да живеат изборните мигранти“ се дел од транспарентите кои ги носат граѓаните.

Организаторите на протестот побараа отворање на избирачките списоци и најавија поголем протест и блокади на улиците доколку тоа не се направи до понеделник.

Еден од лидерите на опозицијата, Мирослав Алексиќ, обвини дека вчера Министерството за државна управа и локална самоуправа добило наредба да ги „прочисти“ избирачките списоци по итна постапка. Оцени дека откако невладиниот Центар за истражување, транспарентност и отчетност (ЦРТА) објави извештај за изборни нерегуларности, обвинителството требало да реагира и да почне со апсење.

„Речиси секој ден дознаваме нови нерегуларности и изборни кражби. Нашите претставници во ГИК и РИК, ЦРТА ѝ презентираа на јавноста во Србија нешто што имплицираше дека Обвинителството треба да започне со апсења. Ги повикувам сите институции да ги земат тие документи и да истражат што се случува“,

рече Алексиќ.

„Поднесовме барања за откажување на изборите, но доколку не ги откажат и игнорираат сите барања, ќе се видиме на протестот во недела, каде ќе ги повикаме сите граѓани“,

додаде тој.

Протестите на кои повикува српската опозиција следат по парламентарните, покраинските и локалните избори во Србија на 17 декември на кои владејачката Српска напредна партија (СНС) прогласи победа на сите нивоа. Опозиционерите, пак, обвинуваат за изборни кражби, особено на изборите во Белград.

Набљудувачката мисија на ОБСЕ и ОДИХР објави дека изборите во Србија биле обележани со сериозни нерегуларности, злоупотреба на јавните средства, медиумска доминација на претседателот на државата Александар Вучиќ и покрај тоа што тој не бил кандидат на изборите, негативна кампања…

• ОБСЕ за изборите во Србија: Вучиќ доминантен во кампањата, политичка поделеност, пристрасни медиуми и поткупување на гласачи

Дел од пратениците во Европскиот парламент повикаа на независна истрага за сите пријавени нерегуларности на изборите во Србија, истакнувајќи дека извештаите и наводите за изборни измами се сериозно загрижувачки.

• Дел од европратениците побараа истрага за наводите за изборни нерегуларности во Србија