Израел продолжува со нападите врз цивилните области во Газа, во синоќешните напади голем број загинати

ГАЗА (АА) – Синоќа во нападите на Израел врз опколениот Појас Газа беа убиени неколку Палестинци, пренесува Анадолу.

Израелските сили од воздух и земја бомбардираа цивилни области, вклучително и бегалскиот камп Џабалија, Рафа и Хан Јунис во Појасот Газа, соопшти палестинската новинска агенција ВАФА.

Во нападите врз Хан Јунис загинаа најмалку шест лица, а други беа повредени.

Телата на загинатите и повредените се пренесени во болницата Насер.

Во меѓувреме, пријавени се жртви и повредени при бомбардирањето на куќите на Палестинците во бегалскиот камп Нусејрат во централниот дел на Појасот Газа.

Најмалку деветмина, повеќето деца, загинаа, а други се повредени во нападите на бегалскиот камп Џабалија во северниот дел на Газа.

Меѓу жртвите се и мајка и нејзините пет ќерки.

Најмалку три лица, меѓу кои и едно дете, загинаа, а неколку се повредени во нападите на израелски воени авиони врз Рафа во јужниот дел на Појасот Газа.

Палестинската Црвена полумесечина соопшти дека примила десетици повици за голем број загинати и повредени при бомбардирање на куќа во регионот Ал-Назла во Џабалија, но ниту една брза помош или спасувачка екипа не можела да стигне до жртвите.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS)..