АНКАРА (АА) – Франција синоќа побара објаснување од Израел за убивањето вработен во Министерството за надворешни работи во воздушен напад врз станбена зграда во Рафа, јужна Газа, јавува Анадолу.
На заедничката прес-конференција со нејзиниот израелски колега Ели Коен во Тел Авив, француската министерка за надворешни работи, Кетрин Колона, рече: „Побаравме целосни информации за околностите што би можеле да го разјаснат таргетирањето на оваа куќа, по експлозијата што резултираше со смрт на вработениот.“
„Министерот Коен вети дека ќе ми даде информации, а јас сметам на брзо добивање прецизни детали и оправдувања што можеа да доведат до таргетирање на оваа куќа, нешто што ние не можеме да го разбереме“, додаде Колона.
Во саботата, француското Министерство за надворешни работи ја осуди смртта на еден од своите вработени поради повреди здобиени во израелски воздушен напад врз градот Рафа во јужниот дел на Газа.
Министерството соопшти дека „одредени вработени побарале засолниште во домот на колега што работел во францускиот Конзулат, а потоа куќата, на 13 декември, е подложена на израелско гранатирање.“
„Франција го осуди гранатирањето на станбениот објект, во кој загинаа и околу 10 други цивили“, соопшти Министерството и ги повика израелските власти „што е можно поскоро да ги разјаснат околностите за ова гранатирање“.
И покрај смртта на вработениот во француското МНР, Колона ја повтори поддршката на нејзината земја за „правото на Израел на самоодбрана“ и на истата прес-конференција изјави: „Тука сум да ја потврдам солидарноста на Франција со израелскиот народ.“
