ИСТАНБУЛ (АА) – Генералниот директор на Светската здравствена организација (СЗО), Тедрос Аданом Гебрејесус, изрази шокираност од неодамнешните случувања во болницата Камал Адван во северниот дел на Газа, која беше оштетена во големи размери од страна на израелската армија за време на нападот на 12 декември, јавува Анадолу.
Болницата е нефункционална и пријавени се најмалку осум смртни случаи.
Гебрејесус ги сподели своите размислувања за случувањата во болницата преку платформата X.
„СЗО е згрозена од огромното уништување на болницата Камал Адван во Северна Газа во последните неколку дена, со што е доведена до степен на нефункционалност, што резултираше со смрт на најмалку осум пациенти“, рече тој.
„Многу здравствени работници се приведени, а СЗО и нејзините партнери итно бараат информации за нивниот статус.“
Челникот на СЗО изрази загриженост дека поради тоа што амбулантните возила не можат да стигнат до установата, многу пациенти биле принудени сами да се евакуираат, со што се ставени во ризик нивното здравје и безбедност.
„Од починатите пациенти, неколкумина се починати поради недостиг на соодветна здравствена нега, меѓу кои и едно 9-годишно дете“, истакна Гебрејесус.
Изразувајќи длабока загриженост и за благосостојбата на раселените лица, кои претходно побарале засолниште во зградата на болницата, Гебрејесус рече: „Здравствениот систем на Газа веќе беше на колена, а загубата на уште една болница, дури и минимално функционална, претставува тежок удар. Напади врз болниците, здравствениот персонал и пациентите мора да прекинат. Прекин на огнот СЕГА“, порача тој.
На 12 декември израелската војска изврши упад во болницата Камал Адван во Беит Лахиа и објави дека притворила 90 лица пред нејзиното повлекување од установата.
По израелското повлекување, палестинскиот новинар Анас ал Шариф, кој влезе во болницата, на платформата Х јави дека десетици раселени, болни и ранети лица живи се закопани.
Извор: www.aa.com.tr
