Според првичните резултати, партијата на Вучиќ има големо водство на изборите во Србија

Од обработени над 50% од гласовите, Српската напредна странка (СНС) на претседателот Александар Вучиќ која настапуваше под слоганот „Србија не смее да запре“ има освоено 47,1 отсто од гласовите. Веднаш зад нив е коалицијата Србија против насилството која освоила 23,1 отсто, додека пак Социјалистите на актуелниот министер за надворешни работи Ивица Дачиќ има освоено 6,9% од гласовите

Премиерката на Србија и повереникот на одборот на белградското крило на СНС, во обраќањето од штабот на партијата кажа дека нивната партија е убедлив победник и дека победата е поголема од очекувањата, нешто што претходно го кажа и претседателот на земјата Александар Вучиќ.

Покрај СНС, во Парламентот се очекува да влезат второрангираните – „Србија против насилство“, Социјалистите на Дачиќ, листата „Надеж“, а изненадување е и листата на докторот Несторовиќ кој освои 4,8% од гласовите.

Поради поголемата излезеност во градот Белград, опозициската листа „Србија против насилство“ смета дека постојат реалистични шанси клучот на градот да им припадне ним.

„Тврдиме дека е голема шанса, односно според сите изгледи сме победиле во град Белград. Затоа што излезноста на избирачките места каде нашата коалиција на минатите избори оствари добар резултат-порасна. А на избирачките места каде СНС минатите избори имаше голема подрршка, излезноста падна“,

рече Пеџа Митровиќ од изборниот штаб на „Србија против насилство“.

Претседателот на Социјалдемократската партија Борис Тадиќ вечерва ги повика сите опозициски партии заеднички да поднесат кривична пријава против организаторите на, како што наведе, „незаконското гласање на граѓаните од соседните држави“. Тадиќ на социјалната мрежа Х повика на заедничко поднесување кривична пријава против службениците во МВР кои „незаконски прифатиле измени во пријавувањето на живеење на државјаните на соседните држави, со цел да се влијае на конечниот резултат на избори“.

По вторпат во изминатите две години гласачите во Србија излегоа на парламентарни избори да одлучуваа за идното свикување на собранието, а според првичните резултати победата ја извојува Српската напредна странка со коалиционите партнери, јавија белградски медиуми. Како што претходно објавија медиумите во Белград, претставници на опозицијата и дел од граѓаните тврдат дека во Штарк арената во Белград масовно се собираат луѓе кои биле донесени да гласаат со автобуси од Република Српска, кои потоа по списоци се распоредени на различни избирачки места.