ЖЕНЕВА (АА) – Илјадници луѓе се собраа денес во Женева, Швајцарија, за да пратат порака на поддршка за Палестина и маршираа упатувајќи апел за моментален и траен прекин на огнот во Појасот Газа, известува Анадолу.
Организаторите на протестот рекоа дека на собирот учествувале околу 8.000 луѓе.
И покрај ладното време, насобраните прошетаа од Плоштадот „Parc Des Cropettes“ до платото пред канцеларијата на Обединетите нации во Женева.
Тричасовниот собир се одржа со силни безбедносни мерки.
Учесниците на протестот виореа палестински знамиња, а носеа и фотографии на кои се прикажани масакрите што Израел ги изврши во Газа.
Демонстрантите кои протестираа против убиството на жените и децата во Газа извикуваа слогани на англиски, француски и арапски јазик во знак на поддршка на Палестина.
Повикаа на ставање крај на израелскиот геноцид во Газа, а протестираа и против политиката на американскиот претседател Џо Бајден и на израелскиот премиер Бенјамин Нетанјаху.
Еден од демонстрантите, Алжирецот Софијан Лусиф, за Анадолу рече дека Израел мора да ги запре злосторствата над недолжните деца и жени и дека Палестина мора да биде слободна земја.
„Учествувам на овие демонстрации шести или седми пат бидејќи некои нешта во Палестина не се менуваат. Ќе продолжам да учествувам на демонстрациите сѐ додека Израел не престане со нападите“, рече Али Хајдаревиќ, учесник на протестот со потекло од Босна и Херцеговина.
На протестите во Женева беше и Фатима од БиХ, која изјави дека со своето учество испраќа порака на поддршка за Палестинците кои се изложени на геноцид.
„Ова е неподнослива ситуација. Нема што повеќе да се каже. Сакаме да живееме во свет во кој постои солидарност“, рече Швајцарката Хима Шарма.
