ГАЗА (АА) – Палестински цивил заробен од Израел во Појасот Газа изјави дека израелските сили поставиле експлозив на неговото тело и дека како жив штит бил принуден да влезе во тунел за кој се сомневало дека го користи Хамас, пренесува Анадолу.
Медиумската куќа „Middle East Eye“ (MEE) пишува дека 30-годишниот Палестинец Хаким, кој не сакал да го открие својот целосен идентитет, изјавил дека е еден од цивилните затвореници од фотографиите објавени од страна на израелски војници, а на кои затворениците се полуголи и врзани со лисици.
Хаким рекол дека израелските војници му ставиле елек со експлозив и камера GoPro на главата, а потоа го принудиле да влезе во тунелот и да провери дали во него има борци на Хамас.
„Тие беа подготвени да го разнесат тунелот со експлозив доколку има борци во него. Во тој момент бев 100% сигурен дека ќе умрам, но ме извлекоа од него кога увидоа дека нема никој во тунелот“, рекол Хаким.
Тој рече дека на ист третман претходно било подложено и 15-годишно момче и дека преживеало и момчето кое било затворено со него.
Зборувајќи за своите искуства во заробеништво, Хаким рече дека со денови биле без храна.
„Само понекогаш ни даваа вода и нѐ навредуваа со најлошите зборови што може да се замислат“, рекол Хаким и додал дека неговиот брат и другите роднини сѐ уште се во заробеништво.
Извор: www.aa.com.tr
