АНКАРА (АА) – Шефот на Дирекцијата за комуникации при Претседателството на Република Туркије, Фахретин Алтун, изјави дека технологијата за вештачка интелигенција станала важна реалност и во медиумскиот свет, јавува Анадолу.
Алтун се обрати на форумот „Управување со вештачката интелигенција во медиумите“ во турската престолнина Анкара, кој се одржа во соработка со Анадолу и Билисим Вадиси (ИТ-долина).
„Со водство на нашиот претседател Реџеп Таип Ердоган, новата ера ја дефинираме како век на комуникацијата и дигитализацијата и работиме на правичната употреба на технологиите за вештачка интелигенција во медиумите“, рече Алтун.
Тој особено ја нагласи важноста на управувањето со вештачката интелигенција наместо само користење или блокирање на вештачката интелигенција во медиумите.
Алтун изјави дека вештачката интелигенција претставува сериозни предизвици од една страна, но нуди и големи можности.
„Свесни сме дека технологијата за вештачка интелигенција сега е важна реалност на медиумскиот свет. Многу е јасно дека овде не ни треба оптимизам или песимизам, треба да бидеме реални. Не треба да има место за технолошки детерминизам и технофобија кога ние зборуваме за вештачка интелигенција“, рече тој.
Тој објасни дека најосновна карактеристика на вештачката интелигенција е нејзината способност да учи, анализира податоци, решава проблеми и да се приспособува на новите предизвици.
Коментирајќи го прашањето за употребата на вештачката интелигенција во медиумите, тој посочи дека сѐ повеќе се зборува за практиката на продукција на вести.
„Сите знаеме дека вештачката интелигенција има способност брзо да произведува вести преку анализа на многу податоци и способности за обработка на јазикот. Поради оваа причина, знаеме дека вештачката интелигенција стана многу привлечна во медиумите. Вештачката интелигенција може да понуди и персонализирана содржина за медиумски потрошувачи со своите алгоритми. Друг начин на користење на вештачката интелигенција во медиумите е анализата, класификацијата и означувањето на визуелните содржини“, рече Алтун и додаде:
„Кога ќе ги земеме предвид сите овие предности и можности на вештачката интелигенција, дали само треба да се олабавиме и да уживаме? Се разбира дека не, ние го немаме тој луксуз. Треба добро да погледнеме со какви предизвици се соочуваме во медиумите користејќи вештачки интелигенција и како може да ги надминеме“, рече тој.
Тој нагласи дека најголем ризик во медиумскиот простор што го регулира вештачката интелигенција е сензационалната содржина да стане главен референтен извор и репродукција на сензационални текстови наместо добро проучени текстови.
„Ако ги ставиме луѓето, културата и историјата во фокусот, употребата на вештачката интелигенција во медиумите може да биде сигурна. Во спротивно, ќе ја изгубиме нашата референтна точка и ќе бидеме осудени на анархија и хаос“, рече Алтун.
На крајот, тој посочи дека ако денес зборуваме за праведен медиумски поредок заснован врз вистината на глобално ниво, тогаш „како човештво мора да воспоставиме здрава рамнотежа меѓу правдата и моќта за да обезбедиме мир, просперитет и стабилност на глобално ниво“.
На форумот присуствуваа и претседателот на Управниот одбор и генерален директор на Анадолу, Сердар Карагоз, генералниот директор на Билисим Вадиси, Еркам Тузген, и други официјални лица.
