РИМ (АА) – Најмалку три лица загинаа во голем пожар што избувна синоќа во болница во Тиволи, на околу 30 километри источно од Рим, принудувајќи го персоналот да евакуира околу 200 пациенти, јавува Анадолу.
Пожарот, за кој се верува дека започнал во подрумските простории на болницата „Сан Џовани Евангелиста“, стигнал до одделенијата за итни случаи и за интензивна нега, а другите одделенија се наполниле со густ чад, изјавија спасувачите.
Од трите жртви на пожарот две починале од вдишување чад, а третата од срцев удар.
Четвртото лице, за кое првично беше кажано дека починало како резултат на пожарот, починало непосредно пред да избие пожарот, соопштија официјални претставници.
Околу 200 пациенти се евакуирани во блиската општинска сала, а потоа се префрлени во други болници во Рим.
За пожарот отворена е истрага, кој пожарникарите го изгаснаа рано утрово.
Тиволи е познат во Италија и во странство по Вила д’Есте и Вила Адријана, руралните одморалишта на римскиот император, и двете денес се наоѓаат на листата за светското наследство на УНЕСКО.
