РАМАЛА (АА) – Најмалку шест Палестинци се убиени денес од истрели на израелската армија во бегалскиот камп Ал-Фара на североисточниот Западен Брег, јавува Анадолу.
Палестинското Министерство за здравство соопшти дека „шест Палестинци се убиени, а многу други се ранети во бегалскиот камп Ал-Фара во близина на Тубас“.
Со овој последен насилен инцидент, бројот на Палестинци убиени од страна на израелската армија на Западниот Брег од 7 октомври се искачи на 271, додека 3.250 се повредени, се наведува од палестинското Министерство.
Палестинската Црвена полумесечина исто така соопшти дека нејзините екипи се справуваат со голем број повредени лица во бегалскиот камп Ал-Фара, вклучително и еден тежок случај.
Израелската армија ги спречи екипите на Црвената полумесечина да дадат медицинска помош во кампот, се додава во соопштението.
Очевидци за Анадолу изјавија дека бројни израелски воени сили упаднале во бегалскиот камп Ал-Фара и извршиле рација во домовите на Палестинците, што довело до конфронтации со десетици Палестинци.
Тензиите низ Западниот Брег се зголемени поради израелската воена офанзива во Појасот Газа по прекуграничниот напад на Хамас на 7 октомври.
Израел ја продолжи својата воена офанзива против Појасот Газа на 1 декември, по завршувањето на еднонеделната хуманитарна пауза со палестинската група на отпорот, Хамас.
Најмалку 17.177 Палестинци загинаа, а над 46.000 се повредени во немилосрдните воздушни и копнени напади врз енклавата од 7 октомври по прекуграничниот напад на Хамас.
Според официјалните податоци, билансот на загинати во Израел, во нападот на Хамас, изнесува 1.200.
