Министерот, меѓу другото, информира дека адвокатот на Љупчо Палевски, кој вчера попладне беше на распит, сè уште е во полициска станица, а по завршување на распитот службите ќе одлучуваат за натамошните чекори кои ќе бидат преземени во врска со него
Адвокатот на Љупчо Палевски-Палчо, Васко Стојков, со кого првоосомничениот за двете убиства од земјава замина за Белград на 30 ноември, сè уште е на распит во полициска станица. Тој е во станица од вчера попладне, а по завршување на распитот, како што изјави денеска министерот за внатрешни работи Оливер Спасовски, службите ќе одлучуваат за натамошните чекори кои ќе бидат преземени во врска со него.
„Задржан е во полициска станица на распит којшто сè уште трае во рамките на тоа 24-часовно задржување и кога ќе заврши ќе одлучат службите што понатаму да прават“,
изјави Спасовски одговарајќи на новинарски прашања по посетата на СВР-Охрид.
Адвокатот на Палевски пред неколку дена изјави дека го носел својот клиент на лекарски прегледи во Белград затоа што немал возило. Рече дека имал добра намера да му помогне на Палевски и дека не знаел оти е вмешан во двете убиства, но дека по сѐ се чувствува злоупотребено.
Прашан во врска со скопјанецот кој се сомничи дека го превезувал Палевски од Србија до Турција, а кој беше уапсен по влез во земјава и кому му е одреден 48-часовен притвор, Спасовски вели дека според она што е утврдено, и против него ќе биде поднесена кривична пријава.
„Согласно сето она кое го имаме утврдено, ќе се поднесе кривична пријава и против него“,
додава министерот.
Станува збор за лице со иницијали С. Д., кое Обвинителството го сомничи за кривичното дело помагање на сторител во извршено кривично дело, а кое беше уапсено на 5 декември.
ИЗВОР: 360stepeni.mk
