Во Кинотеката на Република Македонија беше промовирана книгата „Документарниот филм и идентитетот“ на м-р Сунчица Симоновска Веселиновска, виш филмолог во Кинотеката, а пред присутните говора проф. д-р Драгица Поповска од Институтот за национална историја и вон. проф. д-р Атанас Чупоски, советник филмолог во Кинотеката.
Сунчица во Кинотека дојде од една друга хуманистичка област која не беше тесно поврзана со филмската уметноста, но за кусо време благодарение на нејзината упорност, трудољубивост, истрајност, посветеност на работата стана еден од најдобрите и најпродуктивните филмолози во Кинотека. За само десет години откако дојде го одбрани овој магистерски труд, а сега го имаме во облик на книга која е врв на филмолошката дејност, рече проф.д-р Атанас Чупоски во своето обраќање.
Рецензенти на ова печатеното издание на истоимениот магистерски труд на Веселиновска се проф. д-р Антоанела Петковска и проф. д-р Тодор Чепреганов.
Снимањето на документарни филмови кои најчесто се насочени кон обработка на историски факти од минатото, потврдени со актуелните научни истражувања, директно влијаат врз колективната мемеорија – како клучен фактор во обликувањето на националните белези на македонскиот народ. Филмот воопшто, а посебно документарниот филм, има моќ постојано да нè враќа во минатото, поради што се наметнува потребата за зачувување на сите елементи кои заземаат значајно место во идентитетот на еден народ – каде филмот се појавува во улога на еден од чуварите и паметниците на идентитетот на тој народ, вели проф. д-р Тодор Чепреганов.
Кинотеката иако не е образовна институција, во отсуство на Институт за филм таа ги пополнува празнините. Тоа го потврдува и ова издание, кое ќе им користи не само на филмолозите туку и на пошироката јавност.
Кога дојдов во Кинотека филмот за мене беше нешто непознато и ми требаше многу време и труд за да навлезам во овие филмски води. Бев чест посетител на нашата специјализирана библиотека и низ тој библиотечен фонд наидов на неколку изданија кои ја третираа проблематиката на документарниот филм, но многу малку со по некој текст. Тоа ме испровоцира да почнам да истражувам и да пишувам, рече авторката која ги повика помладите колеги да продолжат да работат на оваа проблематика.
Republika.mk – содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
ИЗВОР: republika.mk
