АНКАРА (АА) – Израелската армија спроведе серија бомбардирања во текот на ноќта низ Појасот Газа, во кои има десетици загинати Палестинци, јавува Анадолу.
Палестинската новинска агенција Вафа објави дека израелските сили извршиле напад на станбената зграда на семејството Ал-Јазиги во населбата Шеик Радван во градот Газа, во кои има загинати, меѓу кои и жени и деца.
Израелски воздушен напад е извршен и врз дом во бегалскиот камп Хан Јунис во јужниот дел на Појасот Газа во кој има неколку загинати и повредени.
Во неколку области низ палестинската енклава беа спроведени интензивни израелски воздушни напади познати како „огнени појаси“.
Во огнените појаси се врши напад на одредена област со серија жестоки бомбардирања кои завршуваат со уништување на целата област.
Лекарите и раселените лица во болницата Дар ес Салам во Хан Јунис упатија повици за заштита од израелското жестоко бомбардирање околу болницата, додаде Вафа.
Израел ја продолжи својата воена офанзива врз Појасот Газа во петокот по завршувањето на еднонеделната хуманитарна пауза со палестинската група Хамас.
Најмалку 15.899 Палестинци се загинати, а над 42.000 се повредени во немилосрдните воздушни и копнени напади врз енклавата од 7 октомври по прекуграничниот напад на Хамас.
Според официјални податоци, билансот на загинати во нападот на Хамас во Израел изнесува 1.200.
