На прашања на „360 степени“, од Министерството за одбрана рекоа дека Петровска присуствувала на денешната владина седница и дека гласала „воздржано“ за дополнувањето на рестриктивните мерки за Русија со кои се отвора простор за доаѓање на министерот Лавров на Министерскиот совет на ОБСЕ
На прашањето – каков став ќе има Министерството за одбрана со оглед на тоа што денешната владина одлука упатува на тоа дека одобрение за слетување на руски државен авион треба да даде и МО, од одбрана не дадоа прецизен одговор
Владината одлука со која се дозволува прелет и слетување на руски државен воздухоплов над и во земјава за време на одржувањето на Министерскиот совет на ОБСЕ, не ја добила поддршката од сите присутни министри на денешната седница.
„Воздржано“ во однос на одлуката се изјаснила министерката за одбрана Славјанка Петровска.
А, Министерството за обрана, со кое раководи Петровска, заедно со Министерството за надворешни работи се надлежните министерства кои треба да издадат одобрение за слетување на воздухопловот на Руската Федерација на територијата на земјава, со кој се очекува да допатува шефот на руската дипломатија Сергеј Лавров со своја делегација на Министерскиот совет на ОБСЕ.
Дека Петровска се изјаснила „воздржано“, за „360 степени“ потврдија од Министерството за обрана, до кое упативме три прашања во врска со денешната владина одлука.
- Дали министерката за одбрана присуствувала на денешната владина седница?
- Ако присуствувала, каков бил нејзиниот став за денешната одлука за „дополнување на Одлуката за воведување рестриктивни мерки во поглед на активностите на Руската Федерација, со која се ограничува пристапот на воздухопловот на Руската Федерација“?
- Каков став ќе има Министерството за одбрана со оглед на тоа што денешната владина одлука упатува на тоа дека одобрение за слетување на руски државен авион треба да даде и МО?
Одговорот што го добивме оттаму гласи:
„Да, министерката беше присутна на седницата и гласаше воздржано во врска со предлог-одлуката за дополнување на Одлуката за рестриктивни мерки. Кога ќе биде доставено официјално барање од МНР, согласно процедурите, Министерството за одбрана ќе го извести МНР соодветно, притоа имајќи ги предвид донесените политички одлуки и ставови во државата.”
Повод за нашите прашања до кабинетот на Петровска беше нејзиниот став, искажан пред неколку дена – дека не гледа причина министерот за надворешни работи на Русија, Сергеј Лавров, да учествува на состанокот на ОБСЕ во Скопје, ако се има предвид однесувањето на Русија и нејзината надворешна политика.
„Нема потврда за доаѓањето на Лавров, меѓутоа со оглед на однесувањето на руската надворешна политика, нивното мешање во внатрешните работи на државите, меѓутоа пред сè нивниот однос кон Украина, не гледам зошто тој би доаѓал овде“,
изјави министерката за одбрана на 21 ноември во „Тема на денот“ во Дневникот на Македонската телевизија (МРТ).
Притоа, Петровска порача и дека изминатиов период Северна Македонија како претседавач со ОБСЕ навистина даде сè, вложи максимум напори успешно да се заврши претседавањето и ОБСЕ да ја исполни својата мисија.
„Не зависи секогаш сè од нас. И останатите земји членки, во случајов и Русија како членка на ОБСЕ, треба да покаже дека навистина знае да ги негува и да ги вреднува вредностите на ОБСЕ“,
рече министерката.
Од одговорот на Министерството за одбрана останува нејасно што значи делот во кој се вели дека ,,кога ќе биде доставено официјално барање од МНР, согласно процедурите, Министерството за одбрана ќе го извести МНР соодветно, притоа имајќи ги предвид донесените политички одлуки и ставови во државата”. Дали дека МО ќе даде согласност за слетување на авионот на Лавров, ако дојде до таква ситуација, или – не.
Владата на денешната седница донесе одлука со која се врши измена и дополнување на актуелните рестриктивни мерки кон Руската Федерација кои земјава ги воведе по руската инвазија врз Украина, а согласно кои беше воведена забрана за влез на руски воздухоплови во воздушниот простор на Северна Македонија. Одлуката за ограничување на пристапот на руски авиони Владата ја донесе во февруари минатата година приклучувајќи се кон регулативата на Советот на ЕУ од заедничката надворешна и безбедносна политика на Унијата.
Сепак, одобренијата за прелет и слетување на рускиот воздухолов, како што соопштија од Владата, ќе треба да ги донесат министерствата за надворешни работи и за одбрана.
„Надлежните министерства за надворешни работи и за одбрана ќе можат дополнително да одлучат за издавање одобрение за прелет и слетување на рускиот воздухоплов за време на одржувањето на триесеттиот министерски состанок на ОБСЕ во Скопје, во период од 29 ноември до 1 декември 2023 година“,
соопштија од Владата.
Одлуката со која се изменуваат конкретните рестрикции кон Руската Федерација, како што посочуваат од Владата, е согласно регулативата на Европската Унија и одредбите во самите рестриктивни мерки со кои за меѓународните конференции, како што е ОБСЕ, се предвидени исклучоци.
Засега останува неизвесно доаѓањето на шефот на руската дипломатија Сергеј Лавров на Министерскиот совет на ОБСЕ од 29 ноември до 1 декември во Скопје.
ИЗВОР: 360stepeni.mk
