Вилма Русковска разрешена од јавен обвинител, Советот на ЈО гласаше едногласно

Советот на јавни обвинители денеска едногласно го усвои предлогот на Комисијата за утврдување дисциплинска одговорност за разрешување на обвинителката, откако против неа и уште две нејзини колешки беше поведена дисциплинска постапка поради претресот во Управата за финансиска полиција пред речиси една и пол година

Поранешната шефица на Обвинителството за гонење организиран криминал и корупција (ОЈО ГОКК) веќе не е јавен обвинител.

Советот на јавни обвинители денеска едногласно го усвои предлогот на Комисијата за утврдување дисциплинска одговорност за разрешување на обвинителката, откако против неа и уште две нејзини колешки беше поведена дисциплинска постапка поради претресот во Управата за финансиска полиција пред речиси една и пол година.

Претходно членовите на Советот на ЈО едногласно одлучија да се одбие жалбата на Русковска во врска со предлогот за нејзино разрешување, по што се премина на гласање по предлогот за нејзино разрешување.

„Едногласно е усвоен предлогот на Комисијата за разрешување на Вилма Русковска од функцијата јавен обвинител“,

констатира претседателката на Советот на јавни обвинители, Душица Димитриеска.

Во рамките на постапката по истиот предмет, Советот исто така едногласно ја одби жалбата на обвинителката Ивана Трајчева како неоснована и го усвои предлогот на Комисијата да ѝ се изрече мерка намалување на платата за 30 отсто, во траење од шест месеци.

Воедно, Советот донесе решение за престанок на функцијата јавен обвинител на Вилма Русковска.

Членовите на Советот само гласаа по предлогот на Комисијата, но не дадоа образложение за едногласно донесената одлука.

Дискусијата по точката 3 која се однесуваше на предметот траеше околу половина час, а јавноста беше исклучена заради заштита на угледот на обвинителите за кои станува збор.

Сепак, пред и за време на гласањето имињата на двете санкционирани обвинителки беа соопштени.

Против Русковска и обвинителките Ивана Трајчева и Елизабета Јосифоска беше отворена дисциплинска постапка од страна на Јавното обвинителство поради претресот во просторите на Управата за финансиска полиција летото 2022 година, додека директор на оваа институција беше Арафат Муареми.

Комисијата за утврдување дисциплинска одговорност на 30 март годинава одлучи да му предложи на Советот на јавни обвинители Русковска да биде разрешена, Трајчева да биде казнета со намалување на платата за 30 отсто, додека Јосифоска беше ослободена од одговорност. Русковска тогаш не сакаше да го коментира предлогот за нејзино разрешување, но рече дека ќе се бори докрај со сите средства.

Предлогот за поведување дисциплинска постапка против трите обвинители го даде републичкиот јавен обвинител Љубомир Јовески, кој дополнително ја суспендира Русковска од работното место уште во август 2022 година.

Претресот на УФП од страна на ОЈО ГОКК беше извршен на 18 јули лани и со него ескалираше антагонизмот помеѓу Русковска и тогашниот директор на Управата, Арафат Муареми.

Муареми тогаш јавно обвинуваше за незаконит претрес и најави и кривични пријави против трите обвинителки. Тогаш, по налог на Јовески беше извршен и надзор, по што од Јавното обвинителство излегоа со соопштение дека констатирале пропусти во постапувањето при претресот во УФП, меѓу што посочија и дека во барањето за претрес до судот што го поднеле обвинителките било наведено дека има основи на сомнение за сторено кривично дело, а во списите од предметот имало само анонимна кривична пријава.

Русковска, пак, овој предмет го наведе како еден од трите (заедно со тој за поранешниот генсек на Владата, Драги Рашковски и за станицата за технички преглед „Виа комерц“) што придонеле таа да биде суспендирана.

Републичкиот обвинител Љубомир Јовески во гостување на ТВ Телма на почетокот на април годинава тврдеше дека нема политика во случајот со суспендирањето и предлогот за разрешување на поранешната шефица на Основното јавно обвинителство за гонење организиран криминал и корупција (ОЈО ГОКК), Вилма Русковска. Причината за нејзината суспензија, како што посочи Јовески, е поради незаконитоста во предметот во врска со претресот во Финансиската полиција.

„Апсолутно нема политика. По тој предмет имаше само една анонимна кривична пријава која подолг период седела во фиоката на обвинителката Русковска. Првиот ден кога таа замина на одмор, дејствијата за наредба на претрес ги препуштила на обвинителката Ивана Трајчева, без да има преземено никакво претходно дејство по анонимната пријава. Во наредбата стои кривично дело примање награда за незаконито влијание, но од анонимната пријава немаше елементи за вакво кривично дело“,

рече Јовески во интервјуто за ТВ Телма.

На почетокот на јуни Обвинителството за гонење организиран криминал и корупција (ОЈО ГОКК), чиј актуелен шеф е Ислам Абази, ги затвори предметите против поранешниот директор на Управата за финансиска полиција (УФП), Арафат Муареми, и вработени истражители бидејќи утврдило дека не постои основно сомнение дека пријавените ги сториле кривичните дела.