Столтенберг од Скопје го поздрави договорот меѓу Хамас и Израел за ослободување на заложниците

Регионалната безбедност, војната во Украина, како и конфликтот на Блискиот Исток ќе бидат темите на кои ќе ги дискутираат Столтенберг и лидерите на земјите членки на НАТО од регионот на неформалниот самит што денеска се одржува во Скопје

Генералниот секретар Јенс Столтенберг од Скопје го поздрави договорот меѓу Хамас и Израел за ослободување заложници, постигнат со посредство на Катар и САД.

„Го поздравувам договорот меѓу Хамас и Израел кој треба да води кон ослободување на заложници и пауза во непријателставата и да овозможи испорака на хуманитарна помош“,

рече Столтенберг во пред новинарите пред почетокот на неформалниот самит на лидерите на земјите сојузнички во НАТО од регионот, кој денеска се одржува во Скопје.

Инаку, Столтенберг пред почетокот на состанокот повтори дел од пораките што вчера ги упати на прес-конференцијата со премиерот Димитар Ковачевски, како и во неговото обраќање пред пратениците во Собранието.

Генералниот секретар на НАТО ја посочи земјава како успешен пример на мултиетничко општество и ценет сојузник во Северноатлантската алијанса.

„Дозволете да почнам со тоа што ќе се заблагодарам за вашето лидерство, за вашата лична посветеност на НАТО, на Трансатллантската алијанса и тоа што Северна Македонија е успешен земја на многу различни начини, вклучувајќи го и тоа што е успешно мултиетничко општество, демонстрирајќи му на поширокиот регион и на светот дека луѓе со различна заднина можат да живеат заедно во мир“,

рече шефот на НАТО пред почетокот на состанокот.

Регионалната безбедност, војната во Украина, како и конфликтот на Блискиот Исток ќе бидат темите на кои дискутираат Столтенберг и лидерите на земјите членки на НАТО од регионот.  

„Северна Македонија е високоценет сојузник и тоа се демонстрира со фактот што денеска го одржуваме овој самит на лидерите на НАТО овде. Се нетрпение ја очекувам да дискутирам за регионалната безбедноста со лидерите на земјите сојузници во НАТО од регионот, како и да ги адресираме некои од предизвиците со коишто се соочуваме надвор од овој регион. Гледаме поголем глобален натпревар, поголем натпревар во моќ, војната во Украина и понатаму беснее, има нова војна на Блискиот Исток“,

кажа генералниот секретар на НАТО.

Неговиот домаќин, премиерот Димитар Ковачевски, во изјавата пред почетокот на самитот рече дека му е драго што Северна Македонија е домаќин на неформалниот состанок на лидерите на земјите членки на НАТО од регионот, со што уште еднаш се потврдува нашата улога на фактор на безбедност во регионот, како и земја членка на Алијансата која целосно и посветено е насочена кон исполнување на своите обврски.

„На денешниот состанок ќе разговараме за регионалните безбедносни прашања, меѓутоа секако дека ќе разговараме и за клучните теми во однос на војната во Украина, конфликтот којшто се води во Појасот Газа, како и за сите други прашања кои се однесуваат на градење на долгорочен мир, стабилност и безбедност во нашиот регион, меѓутоа и во Европа и во светот“,

рече македонскиот премиер Ковачевски.

На неформалниот самит денеска во Скопје учествуваат премиерот на Албанија, Еди Рама; претседателот на Хрватска, Зоран Милановиќ; премиерот на Црна Гора, Милојко Спајиќ и премиерот на Словенија, Роберт Голоб.

Со денешниот самит во Скопје генералниот секретар на НАТО ќе ја заокружи неколкудневната турнеја на земјите од Западен Балкан, во рамките на која ги посети Босна и Херцеговина, Косово, Србија и вчера и денеска С Македонија.