ИСТАНБУЛ (АА) – Катар рано утрово соопшти дека почетокот на „хуманитарната пауза“ меѓу Израел и Хамас ќе биде објавен во рок од 24 часа, пренесува Анадолу.
„Државата Катар го објавува успехот на нејзините заеднички напори за посредување преземени со Арапската Република Египет и Соединетите Американски Држави меѓу Израел и Движењето на исламскиот отпор (Хамас), што резултираше со договор за хуманитарна пауза“, соопшти Министерството преку платформата Х.
„Почетното време на паузата ќе биде објавено во следните 24 часа и ќе трае четири дена, кои може да се продолжат“, се наведува во соопштението.
„Договорот вклучува ослободување на 50 цивили, жени и деца заложници што моментно се држат во Појасот Газа во замена за ослободување на одреден број палестински жени и деца што се приведени во израелските затвори, а бројот на ослободените ќе се зголеми во следните фази на спроведување на договорот“, се додава од Министерството.
Хуманитарната помош, во која ќе биде вклучено и гориво, ќе биде дозволена во Појасот Газа.
„Државата Катар ја потврдува својата посветеност на тековните дипломатски напори за деескалација на тензиите, запирање на крвопролевањето и за заштита на цивилите“, додава Министерството.
„Во оваа насока, државата Катар ги цени напорите на Арапската Република Египет и Соединетите Американски Држави за постигнување на овој договор“, се нагласува.
