АНКАРА (АА) – Израелската војска уби уште двајца палестински новинари во воздушните напади во текот на ноќта низ Појасот Газа, пренесува Анадолу.
Според државната палестинска новинска агенција Вафа, во израелскиот воздушен напад врз куќа во градот Газа загинале неколку Палестинци, меѓу кои и новинарката Ала Тахер ал Хасанат.
Се истакнува дека уште една новинарка, Ајат Кадура, е убиена во израелскиот воздушен напад врз нејзиниот дом во градот Беит Лахија, во северниот дел на Појасот Газа.
Според новинската агенција, Кадура била во живо на палестинската телевизија Ал Гад непосредно пред бомбардирањето на нејзиниот дом. Таа на телевизијата рекла: „Ова може да биде моето последно јавување.“
Таа, исто така, рекла дека израелската Армија истрелала бомби со бел фосфор врз Беит Лахија за да ги истисне Палестинците од градот.
Од 7 октомври досега во Газа се убиени повеќе од 60 палестински новинари.
Израел започна немилосрдни воздушни и копнени напади во Појасот Газа по прекуграничниот напад на палестинската група Хамас на 7 октомври.
Властите во Газа во понеделникот соопштија дека бројот на жртви од тековните израелски напади врз енклавата од 7 октомври се искачил на над 13.300, од кои 5.600 се деца, а 3.550 жени.
Бројот на загинати во Израел, според официјалните податоци, е околу 1.200.
