ГАЗА (АА) – Нападите што израелската војска ги изведува во блокираниот Појас Газа од 7 октомври продолжуваат веќе 39 дена, известува Анадолу.
Официјалната палестинска агенција ВАФА објави дека израелската војска во текот на цела ноќ изведувала интензивни воздушни напади на Појасот Газа.
Во нападите на израелските авиони на куќата на семејствата Ал Ага и Абу Џамиз во источниот дел на Хан Јунис убиени се 10 лица, главно, деца. Во веста се наведува дека има и повредени.
Според соопштението објавено на профилот на каналот Ал Акса на социјалната мрежа Телеграм, чест лица загинале, а голем број се ранети и при бомбардирањето на куќата на семејството Ес Севарик во близина на училиштето „Ал Фахур“ во бегалскиот камп Џабалија.
Во бомбардирањето на бегалскиот камп Џабалија животот го загубиле и палестинските одбојкари Хасан Заитер и Ибрахим Касие.
Во соопштението се наведува дека во нападите што траеле цела ноќ целосно се уништени 12 куќи во Џабалија, а десетици луѓе се убиени.
Израелската војска ги прошири своите воздушни и копнени напади со неселективно бомбардирање на цивилни населби, станбени објекти, џамии, цркви и болници во Појасот Газа, кој е под немилосрдни израелски напади по неочекуваната офанзива на Хамас на 7 октомври.
Од 7 октомври досега во израелските жестоки напади на Појасот Газа убиени се најмалку 11.240 Палестинци, од кои 4.630 деца и 3.130 жени, а повеќе од 28.200 се ранети.
На Западниот Брег и во Кудс (Ерусалим) израелските сили и еврејските доселеници убија 193 Палестинци.
