Во ДУИ преовладува малку ставот дека, заради логиситички, финансиски и административни причини, треба можеби заедно да се оди. Но, нема сè уште утврден став бидејќи не заседавале официјално телата на партијата – вели потпретседателот на Демократската партија на Албанците
Османи вели и дека ДУИ очекува да се реализира политичкиот договор со СДСМ во последните сто дена пред избори Владата да ја води премиер Албанец, отфрлајќи ги како неточни јавните наводи дека технички премиер би можел да биде Фатмир Битиќи, кадар на СДСМ
Во ДУИ преовладува мислењето за одржување парламентарни избори истовремено со претседателските, вели за емисијата „360 степени“ на МРТ 1 министерот за надворешни работи и портпарол на ДУИ, Бујар Османи. Според него, партијата сè уште нема официјален став во однос на ова прашање, но се прават, како што вели, координации на дневна основа и сите опции се отворени. За ДУИ, сепак, се прифатливи двете варијанти, вели Османи.
„Во ДУИ преовладува малку ставот дека, заради логиситички, финансиски и административни причини, треба можеби заедно да се оди. Но, нема сè уште утврден став бидејќи не заседавале официјално телата на партијата. Јас очекувам во текот на месецот да се завршат тие состаноци, но сепак преовладува мислење дека на три месеци, два изборни циклуса, премногу ќе ја чинат државата. Не само финансиски туку системот се парализира“,
рече тој.
На прашањето за претседателски кандидат, Османи вели дека ДУИ се уште нема прецизирано дали ќе настапи со свој. Ги разгледуваат двете варијанти и ќе се позиционираат во зависност од тоа дали ќе има заеднички избори, додава тој.
Според него, се уште се размислува и за можни предизборни коалиции.
„Османи: Не можам да кажам, не знам колку се созреани условите за тоа.
360°: За со СДСМ?
Османи: Да. Нема финална одлука, но зборувам за опциите што доминираат.
360°: А со Алијанса за Албанците?
Османи: Постои можност, но ќе видиме како ќе одлучат двете партии, ние сме две самостојни партии, доколку гледаме можност од тоа да се изгради посилна политичка платформа, зошто да не.“
Во последните сто дена пред избори Османи очекува да се почитува договорот со СДСМ за премиер Албанец.
„Османи: Доколку изборите се заеднички, почеток на јануари влегуваме во последните сто дена и очекувам тогаш да имаме премиер предложен од ДУИ. Доколку е другото сценарио, тогаш се други рокови, меѓутоа договорот останува.
360°: Деновиве се слушаат и други опции, да биде премиерот Албанец, меѓутоа да биде кадар на СДСМ, на пример – Фатмир Битиќи се спомнуваш како опција.
Османи: Не. Со цела почит кон Битиќи, меѓутоа рековме дека мнозинската волја на Албанците мора да се одразува во институциите.“
За изјавите на лидерот на ВМРО-ДПМНЕ, Христијан Мицкоски, дека ДУИ ќе замине во опозиција по изборите, бидејќи тој за коалиционен партнер во Владата ги фаворизира партиите од албанската опозиција, Османи вели дека станува збор за анти-ДУИ кампања и за албанофобија.
„Штом Мицкоски фаворизира албански претставник, тоа кажува се за нив. Мене би ми било незгодно да ме фаворизира Мицкоски. Се сеќавате на Заев кога научи албански и на митинзите велеше: ‘Псе јо? Зошто да не ДУИ во опозиција’? И после видовте. Во суштината на таква анти-ДУИ кампања е албанофобија, која се обидуваат да ја искористат кај понационалистичко гласачко тело, за да профитираат. Кога се чувствуваат во криза од губење на тврдокорно гласачко тело, одат кон варијанта да ги мобилизираат и нив, за да излезат посилни на изборите“,
оценува потпретседателот на ДУИ.
За опцијата за формирање концентрациска влада по изборите, заради носење на уставните измени, Османи вели дека не е разговарано, но трите договори (Рамковниот, со Бугарија и Преспанскиот, н.з.) за ДУИ се „црвените линии“.
„Државата не може сама без преговарачки процес со ЕУ. Ова одложување и пропуштање на геополитичкиот момент ќе не чини многу и граѓаните ќе сфатат за неколку месеци што им направи опозицијата со блокирање на процесот“,
додава Османи.
ИЗВОР: 360stepeni.mk
