ИСТАНБУЛ (АА) – Израелски воени авиони синоќа извршија неколку напади врз болниците во Газа, вклучително и Ал-Шифа, главната болница во опколената енклава, јавува Анадолу.
Државната палестинска новинска агенција Вафа објави дека тешко бомбардиран е непосредниот простор до болницата Ал-Шифа при што загинале најмалку шестмина Палестинци, а повеќе се ранети.
Израелската армија продолжува со нападите врз болницата Ал-Шифа, со тврдење дека таму е стационирано военото раководство на Хамас, што палестинската група на отпорот го негира.
Министерството за здравство со седиште во Газа соопшти дека во приземјето на педијатриската болница Ал-Рантиси избувнал пожар предизвикан од израелските воздушни напади.
Вафа, исто така, објави дека областа околу Индонезиската болница, северно од Газа, била под серија силни израелски воздушни напади, предизвикувајќи паника меѓу медицинскиот персонал, пациентите и раселените лица засолнети во болницата.
Се додава дека болницата Ал-Авда во северниот дел на Газа била цел на израелски воздушни напади, при што две медицински лица биле ранети, а две возила на брза помош биле уништени.
Палестинската Црвена полумесечина објави дека израелските воздушни напади биле извршени во близина на болницата Ал Кудс во градот Газа, медицинска установа во која престојуваат околу 14.000 раселени Палестинци.
Според Канцеларијата за медиуми на Владата во Газа, 18 болници од 34 во Газа прекинале со работа или поради израелското бомбардирање или поради недостигот на гориво и медицински материјали.
Израел започна немилосрдни воздушни и копнени напади врз Појасот Газа по прекуграничниот напад на палестинската група на отпорот Хамас на 7 октомври.
Загинати се најмалку 10.569 Палестинци, меѓу кои 4.324 деца и 2.823 жени. Според официјални податоци, бројот на загинати во Израел е околу 1.600.
