БЕЈРУТ (АА) – Привремените мировни сили на Обединетите нации во Либан (УНИФИЛ) ги опишаа нападите врз цивилите во јужниот дел на Либан од страна на израелската војска како воено злосторство, пренесува Анадолу.
Портпаролот на УНИФИЛ, Андреа Тененти, објави писмено соопштение во врска со убиството на четворица цивили, од кои три деца, во местата Ајната и Ајтарун во јужниот дел на Либан од страна на Израел.
Тененти нагласи дека УНИФИЛ вчера во текот на денот бил сведок на интензивни пукотници на границата помеѓу Израел и Либан, која се нарекува „сина линија“.
„Слушнавме трагични вести дека четворица цивили, од кои 3 девојчиња и една жена, биле убиени во близина на Ајтарун во јужниот дел на Либан. Јасно е дека постои можност ескалацијата да излезе од контрола, и мора да се преземат мерки“, рече тој.
„Сите надлежни страни ги потсетуваме дека нападите врз цивилите претставуваат прекршување на меѓународното право, и претставуваат воено злосторство. Сите веднаш ги повикуваме на прекин на огнот со цел да се спречи повеќе лица да бидат погодени“, додаде Тененти.
