КУДС/ЕРУСАЛИМ (АА) – Со голема загуба на поддршката, само 27 отсто од Израелците сметаат дека долгогодишниот премиер Бенјамин Нетанјаху е вистинската личност за раководење со Владата, покажуваат резултатите од најновата анкета објавена денес, јавува Анадолу.
Анкетата направена од Институтот за истражување „Лазар“ за израелскиот дневен весник „Маарив“ покажа дека 49 отсто од Израелците, или околу половина, сметаат дека Бени Ганц, лидерот на Партијата за национално единство, е најподобен да ја води израелската Влада.
Анкетата опфати случајни испитаници – 522 возрасни Израелци, со маргина на грешка од 4,3 %.
Според анкетата, голем пад на популарноста има партијата Ликуд предводена од Нетанјаху, со значителен пораст на Партијата за национално единство.
Анкетата е направена по ненадејниот напад на Хамас врз јужен Израел изведен на 7 октомври, при што загинаа над 1.000 Израелци, а беа земени стотици заложници, како и по неколкумесечните протести поради контроверзниот план на Нетанјаху за реформа на судството.
Анализите по нападот го обвинија Нетанјаху за занемарување на безбедноста на нацијата, и тој се соочи со бурни реакции откако јавно одби да преземе каква било одговорност за разорниот напад.
Анкетата покажува дека доколку денес се одржат избори, Партијата за национално единство би освоила 36 од 120 места во Кнесетот (израелскиот Парламент), трипати повеќе од 12-те места што ги има сега.
Партијата Ликуд, според анкетата, би освоила само 19 места, во споредба со 32-те што ги има сега.
