ПАРИЗ (АА) – Во Париз, главниот град на Франција, повторно се одржа голем собир на солидарност со Палестина, во екот на интензивните напади на Појасот Газа, известува Анадолу.
Илјадници граѓани се собраа на познатиот „Плоштад де ла Републик“ во Париз во знак на поддршка поради израелските бомбардирања на Газа.
Насобраните носеа знамиња на Палестина и транспаренти на кои пишуваше „Израел врши геноцид“, „Запрете го масакрот во Газа“, „Сакаме итен прекин на огнот“ и „Слободна Палестина“.
Граѓаните ги извикуваа и слоганите „Во Газа убија деца, во Газа е убиено човештвото“.
Демонстрантите порачаа дека сакаат на овој начин да ја покажат солидарноста со палестинскиот народ и да ги осудат израелските злосторства во Газа.
Собирот одобрен од полицијата помина без инциденти.
Во Париз за сабота се најавени нови протести за поддршка на палестинскиот народ во Газа.
Во француската престолнина изминатите денови беа организирани неколку пропалестински собири.
Израелската војска ги прошири своите воздушни и копнени напади врз Појасот Газа, кој е под немилосрдни авионски бомбардирања по нападот што палестинската група Хамас го изведе врз Израел на 7 октомври.
Во израелските напади на Појасот Газа во изминатите 24 часа се убиени уште 265 Палестинци, со што вкупниот број е зголемен на 9.061, објави вчера палестинското Министерство за здравство. Истовремено се убиени 1.538 Израелци.
