ГАЗA (АА) – Израелските тенкови се повлекоа од главниот автопат Салах ал-Дин во градот Газа по краткиот упад, соопшти денес Владата во Појасот Газа, пренесува Анадолу.
„Нема израелски тенкови на автопатот Салах ал-Дин и животот се нормализира“, се вели во соопштението на владината Канцеларија за медиуми.
Претходно очевидци за Анадолу изјавија дека израелските тенкови се пренесени синоќа од градот Јухор Ад-Дик во источниот дел на Појасот Газа до автопатот Салах ал-Дин, југоисточно од градот Газа.
„Упадот се совпадна со тешко артилериско гранатирање и воздушни напади“, велат тие.
„Окупацијата се обидува да прикаже нереална слика за присуството на нејзините сили во Газа, но тие не може да останат на територијата под ударите на отпорот“, соопшти Канцеларијата за медиуми.
„Нема копнен упад во станбените населби во Појасот Газа“, се додава.
Портпаролот на израелската армија, Даниел Хагари, денес изјави дека армијата „постепено напредува“ во Газа.
„Ние спроведуваме проширена копнена операција во Појасот“, изјави тој за новинарите.
Израелската армија во петокот ги прошири своите воздушни и копнени напади врз Појасот Газа, кој е под немилосрдни воздушни напади од ненадејната офанзива на Хамас на 7 октомври.
Во конфликтот загинаа речиси 9.500 луѓе, меѓу кои 8.005 Палестинци и повеќе од 1.538 Израелци.
