Во инцидентот еден од мигрантите, инаку малолетник, бил повреден, а возачот на комбито при приведувањето физички нападнал полицаец
Товарно возило – комби, полно со мигранти вчеравечер бегајќи од полицијата паднало во ископан канал на една од главните улици во Велес.
Инцидентот се случил околу 20:30 часот на улицата „8 Септември“ во Велес, потврдија за „360 степени “ од Министерството за внатрешни работи.
Оттаму информираат дека во случајот се уапсени две лица, 18-годишник од селото Стар Караорман, Штипско, кој го управувал комбито марка „форд“ и негов врсник од Штип кој му бил сопатник.
Во комбито биле пронајдени 23 лица – мигранти од Сирија од кои 10 се малолетници.
Полициски екипи триесетина минути претходно се обиделе да го запрат возилото на автопатот А1, но возачот со иницијали А.И. продолжил со движењето и влегол во Велес, каде што паднал во ископаниот канал по бркотница со полицијата.
„На 29.10.2023 во 20:30 часот на ул. ’8 Септември’ во Велес, полициски службеници од СВР Велес во координација со полициски службеници од Полициската станица за граничен надзор Михајлово ги лишиле од слобода А.И. (18) од с. Стар Караорман, Штипско и Т.Ј. (18) од Штип затоа што во товарното возило ’форд’ со скопски регистарски ознаки, кое го управувал А.И., а сопатник бил Т.Ј., биле пронајдени 23 лица мигранти од Сирија, од кои 10 малолетници.
Имено, во 20:05 часот на автопатот А1, полициски службеници од Полициската станица за граничен надзор Михајлово дале знак за запирање на возилото, но А.И. продолжил со движење и со возилото влегол во Велес и на ул. „8 Септември“ излетал од патот и со возилото паднал во ископ“,
се наведува во информацијата од МВР.
Во видеоснимка од инцидентот објавена на фесјбук-страницата „Велешки гласник“ може да се видат многубројни полициски екипи како интервенираат на местото на инцидентот. Исто така, може да се забележи и дел од возилото пропаднато во ископаниот канал.
Притоа, како што додаваат од Министерството, со повреди се здобил еден малолетник, кои му биле констатирани во болницата во градот.
Според полицијата, возачот на комбито при приведувањето физички нападнал полициски службеник.
По наредба на јавен обвинител увид на местото извршила екипа од СВР Велес и по целосно документирање на случајот ќе бидат поднесени соодветни пријави.
ИЗВОР: 360stepeni.mk
