ГАЗА (АА) – Бројот на Палестинци загинати во израелските напади врз Газа од 7 октомври се искачи на 8.005, соопшти денес Министерството за здравство во опколената палестинска енклава, јавува Анадолу.
Во соопштението на Министерството се наведува дека 3.342 од жртвите се деца, 2.062 жени и 460 стари лица.
Израел силно ја бомбардира Газа од 7 октомври кога Хамас изврши ненадеен прекуграничен напад. Портпаролот на израелската армија, Даниел Хагари, вчера најави „проширување на операциите“, преминување во „следната фаза од нашата војна против Хамас“.
2,3 милиони жители на Газа се борат со недостиг од храна, вода, гориво и лекови поради блокадата на енклавата од страна на Израел. Само неколку камиони со помош влегоа во Газа од отворањето на преминот Рафа минатиот викенд.
Генералниот секретар на Обединетите нации (ОН), Антонио Гутереш, во денешното обраќање во Катманду, Непал, го повтори својот апел за „итен хуманитарен прекин на огнот, безусловно ослободување на сите заложници и испорака на хуманитарна помош во обем што ги задоволува потребите на населението во Газа.“
