АНКАРА (АА) – Бројот на загинати Палестинци во израелските напади врз Појасот Газа од 7 октомври до денес се искачи на 7.703, објави Министерството за здравство во Газа, јавува Анадолу.
Меѓу жртвите 3.595 се деца, соопшти Министерството.
Оттаму наведоа дека од почетокот на нападите на 7 октомври повредени се 19.734 граѓани.
Министерството, исто така, наведе дека Израел извршил 53 масакри во интензивните бомбардирања на Појасот Газа во текот на ноќта.
Израелската војска вчера ги прошири и интензивира воздушните и копнените напади врз Појасот Газа, кој е под немилосрдни воздушни напади по ненадејниот напад на Хамас на 7 октомври. Меѓународните хуманитарни агенции соопштија дека изгубиле контакт со својот персонал во Газа откако Израел го отсече интернетот и комуникациите за енклавата.
2,3 милиони жители на Газа се борат со недостиг на храна, вода и лекови поради масовното воздушно бомбардирање на Израел и целосната блокада на енклавата.
