За гигантскиот инвестициски концерн Блек Рок обично се вели дека е владетел на светот, нивното богатство се мери во трилиони долари а се занимаваат со управување на инвестициони фондови и советување на централни банки ширум светот, големи инвеститори, влади и министри за финансии.
Тивко и без помпа, како што обично работат, Блек Рок влегоа во Србија во 2019 година кога ја купија софтверската компанија „еФронт“ со околу 500 вработени во Белград.
Деновиве објавија конкурс за позиција потпретседател за што бараат софтверски инженер и лице кое ќе работи во „Програмот за ветерани и спортисти.“ Им се нуди „заедно да ја градиме следната генерација на технологија во светот на глобалните инвестиции.“
За оваа моќна светска компанија, регионалната јавност пошироко се заинтересира кога српскиот опозиционен пратеник и поранешен амбасадор во Велика Британија и Ватикан, Владета Јанковиќ, ја праша премиерката дали е точно дека Блек Рок го откупил јавниот долг на Србија за што земјата ги заложила своите природни богатства.
„Тоа е една семоќна интернационална компанија, со капитал од трилиони долари, која ги има упропастено Пакистан, Аргентина… Се зборува дека го шират работењето во Србија, го преземаат надворешниот долг од 34 милијарди долари за што Србија морала да ги заложи рудните богатства, енергетскиот потенцијал, земјоделско земјиште…. Ако е ова точно, ние ја имаме задолжено Србија до правнуци,“ рече Јанковиќ.
Брнабиќ го демантираше преземањето на долгот и рече дека Блек Рок само поседуваат српски еврообврзници од 138 милиони евра кои се необезбедени и за нив не се гарантира со имотот на Србија.
„Блек рок има профит и кога германски автомобили излегуваат од производствена лента и кога рудари во Јужна Америка копаат руда и кога американските фармацевти развиваат нови лекови и кога во Африка се вади злато. Блек Рок е насекаде,“ напиша Хајке Бухтер која за компанијата вели дека е најголем управител на имот на светот.
**************
**************
ИЗВОР: off.net.mk
