ИСТАНБУЛ (АА) – Во Газа се одвива глобална војна предводена од Соединетите Американски Држави (САД), изјави висок претставник на Хамас, јавува Анадолу.
Халид Мешал говореше преку видеоконференција на Газа форумот во Туркије организиран од околу 60 арапски организации.
Мешал рече дека и покрај 16 години блокада и последователни војни, населението на Газа покажало извонредна издржливост и отпор.
Нагласи дека палестинските вооружени групи презеле значаен чекор кон враќање на светите места и ослободување, но дека тие настани подоцна се претвориле во ционистичка одмазда обележана со уништување училишта, џамии, болници и домови.
Тој, исто така, истакна дека САД и другите западни земји дале зелено светло за израелските напади врз Газа, спроведувајќи тактика на „изгорена земја“ со „цел уништување на отпорот на Хамас и поддршката што ја доби од народот“.
„Војната во Газа започна во знак на поддршка на џамијата Ал-Акса, а потоа продолжи со кукавичка одмазда (напади од Израел, заб.ав.), а денес еволуираше во глобална војна предводена не само од Соединетите Американски Држави, туку и поддржана од САД“, рече Мешал.
Тој ја истакна важноста од обезбедувањето хуманитарна помош за Газа и поддршка на отпорот, заедно со неопходноста од секојдневни демонстрации против нападите и зајакнување на палестинската перспектива во медиумите.
Израелската армија продолжува со интензивните воздушни напади врз Газа, уништувајќи цели квартови.
Најмалку 4.651 Палестинец, меѓу кои 1.873 деца, загинаа во израелските напади врз Газа.
Неутврден број луѓе останаа заробени под урнатините.
Израел ја бомбардира Газа по ненадејниот напад на Хамас на 7 октомври и ја стави целата енклава под блокада, оставајќи ги нејзините 2,3 милиони жители со малку храна, вода, гориво и медицински материјали.
