За тоа до кога земјата е стабилна и сигурна дека не треба да плаќа ништо дополнително врз основа на она што го има воведено Бугарија, Реџепи вели дека неговите очекувања се оти и ноемвриските договори ќе бидат без вклучување на овој данок
Воведувањето данок за рускиот природен гас што транзитира низ бугарскиот гасовод, што Бугарија го воведе пред неколку дена, може да претставува проблем и за македонските снабдувачи и крајните потрошувачи и да влијае на цената.
Бајрам Реџепи, извршен директор на акционерското друштво за вршење на енергетска дејност пренос на природен гас НОМАГАС Скопје во државна сопственост, во интервју за телевизија Телма вели дека на оваа одлука на Бугарија во никој случај не може да се влијае и оти треба во рамките на можностите да се направи тоа што е возможно.
Според Реџепи, освен тоа што е воведена таксата од 10 евра за мегават-час, друг поголем проблем, како што вели, е што има обврска над 70 отсто од количините да бидат земени од „Гаспром“.
„Ова прави исклучително тешка ситуација што може да влијае на нашиот пазар, да има поскапување, во зависност од цените на берзите, од 20 до 25 отсто што е енормно и тоа ќе прави големо нарушување“,
вели Реџепи.
Тој вели дека не побарале од Бугарија да ја смени таксата, туку е побарано да го ослободат тој капацитет што не се користи во моментов, а тоа, како што објаснува Реџепи, им е обврска според ЕУ-директивите.
„Тој капацитет што е закупен и не е користен они треба да го ослободат за другите потрошувачи и снабдувачи. Конкретно тоа го побаравме од ‘Булгартрансгас’ и од ‘Енерџи комјунити’ и они треба да ги почитуваат тие ЕУ директиви и меѓународни договори, да го ослободат тој капацитет и во таков случај нема да бидеме зависни од тие 10 евра што ги воведоа за пренос на руски гас“,
вели тој.
На прашањето што доколку не се најде алтернатива, Реџепи вели дека тоа ќе направи големо нарушување на пазарот на природен гас кај нас.
„Може да дојде и до најлошото, да ескалира ситуацијата бидејќи ако ‘Гаспром’ одлучи да не ја плати таа такса може да дојде во ситуација за неколку месеци тие да ги затворат вентилите за руски гас“,
додава тој.
За тоа дали ќе се најде решение за Македонија, Реџепи вели дека има веќе одредени известувања од страна на Европската комисија дека се започнати преговори за решавање на овој проблем.
„Ќе го чекаме исходот. Иницирана е веќе постапка во ‘Енерџи комјунити’, а тоа не зависи од нас, тоа треба да се реши во рамките на Европската комисија“,
додава тој.
За тоа до кога земјата е стабилна и сигурна дека не треба да плаќа ништо дополнително врз основа на она што го има воведено Бугарија, Реџепи вели дека неговите очекувања се оти и ноемвриските договори ќе бидат без вклучување на овој данок.
„Секако ако потоа не се најде решение тоа ќе биде голем проблем бидејќи ќе се случува во текот на зимата кога е најголема потрошувачката и во држвата и во регионот“,
додава Реџепи.
Новиот предлог-закон во Бугарија, кој стапи во сила веднаш, воведува давачка од 10,76 долари по мегават-час гас од руско потекло. Ова е околу 20 отсто од цената на европскиот репер за гас со кој се тргува во регионалниот центар Амстердам, пренесуваат бугарските медиуми.
ИЗВОР: 360stepeni.mk
