МОСКВА (АА) – Руските пратеници денес ги повикаа ОН и парламентите на другите земји да преземат мерки за запирање на крвопролевањето во Појасот Газа, јавува Анадолу.
Државната Дума, Долниот дом на Парламентот, преку соопштение побара „брзо да се спроведат сите неопходни мерки за да се запрат тековното крвопролевање и интензивирањето на насилството врз цивилите во палестинско-израелскиот конфликт“, со цел да се спречи хуманитарна криза без преседан на Блискиот Исток.
Пратениците, исто така, посочија на нападот на болницата во Газа на 17 октомври, што резултираше со смрт на „стотици невини цивили, вклучително жени и деца“.
„Неоправданата бруталност и непропорционалната употреба на сила веќе доведоа до смрт на неколку илјади луѓе. Варварските методи на решавање на политичките проблеми со вооружени средства доведоа до илјадници антисемитски и исламофобни протести низ светот“, се вели во соопштението.
Државната Дума го осуди секое прекршување на меѓународното хуманитарно право од страна на конфликтните страни, вклучително и употребата на забранета муниција, бомбардирањето, нападите врз цивилната инфраструктура и принудното раселување на цивилите и повика виновниците за воени злосторства да бидат изведени пред лицето на правдата.
Пратениците, исто така, ја критикуваа американската и „колективната“ позиција на Западот за ситуацијата, велејќи дека активностите што ги преземаат само додаваат масло на конфликтот.
Пратениците на државната Дума ги повикуваат парламентарците на земјите во светот да вложат максимални напори за прекин на непријателствата во зоната на конфликтот, да организираат хуманитарни коридори, да им дадат неопходна помош на погодените.
„Само со комбинирање на нашите напори ќе може да запреме нова војна на Блискиот Исток и да се вратиме на преговарачката маса, која треба да се заснова врз балансиран пристап и добро познатите одлуки на Генералното собрание на Обединетите нации и Советот за безбедност на ОН“, истакна законодавното тело.
Палестинската група Хамас изврши ненадеен напад од повеќе страни врз Израел на 7 октомври, на што Тел Авив одговори со немилосрдно бомбардирање и блокада на опколената енклава.
Агенциите на ОН велат дека Газа се соочува со тешка хуманитарна катастрофа, и дека пристапот за испорака на помош и хуманитарниот прекин на огнот се приоритет.
