Идејниот творец на новата политичка партија беше прашан за коментар на тоа што двајца од тројцата главни говорници на настанот за потпишување на Иницијативата за формирање на новиот субјект беа – професорка историчарка (Катерина Тодороска, н.з.) со еден неуспешен обид во политиката (во 2020 година беше носителка во Изборна единица 1 на листата на Демократи и освои 217 гласа – најмалку од 14-те пријавени листи) и поранешен висок армиски старешина (генерал Павле Арсовски, н.з.), кој не доби НАТО-сертификат
Идејниот творец на политичката партија во процес на регистрација – Движење ЗНАМ, Максим Димитриевски, во интервју за „360 степени“ на МРТ 1 беше прашан и за тоа кои луѓе седеа до него на настанот кој се одржа пред една недела во Скопје за потпишување на иницијативата за формирање на новиот .
360°: Двајца од тројцата главни говорници на настанот за потпишување на Иницијативата за формирање политичка партија беа – професорка историчарка (Катерина Тодороска, н.з.) со еден неуспешен обид во политиката – се обиде да стане пратеничка во 2020 година, беше носителка во Изборна единица 1 на листата на Демократи и освои 217 гласа – најмалку од 14-те пријавени листи. Вториот е поранешен висок армиски старешина (генерал Павле Арсовски, н.з.), сега во пензија, кој не доби НАТО-сертификат. Како го коментирате ова?
Димитриевски: Имам високо мислење и за двајцата говорници. Што се однесува до успехот на професорката, мислам дека целиот тој резултат на тие избори и ситe претходни досега единствено е последица на црно-сивиот свет во којшто ние живееме.
360°: Црно-бел, претпоставувам?
Димитриевски: Не црно-бел, туку црно-сив, бидејќи ние бел немаме веќе 30 години и дојдено е време да влезе и некоја посвежа боја на политичката сцена во Македонија, каде што ние како субјект ќе го организираме тоа, ќе им го понудиме на граѓаните. Што се однесува до нивните професионални ангажмани, јас не можам да тврдам во нивно име и тие самите треба да кажат за себе. Инаку, што се однесува до ставовите, мислењата, состојбите во државата, апсолутно сме истомисленици. Генералот Павле Арсовски е човек што јас го имам запознаено овде како градоначалник, работел и функционирал целиот негов период во рамките на мојот мандат и како претседател на Совет… Зошто нема добиено сертификат, тоа треба да се праша претседателот на државата, неговите претпоставени, но тој знам дека води судска постапка, бидејќи сметам дека ние неосновано и многу некоректно ги изложивме нашите највисоки воени официри на јавен блам, каде што дозволивме на нив да се покажува со прст.
На новинарска констатација дека претседателот не ги дава сертификатите, туку НАТО, Димитриевски вели:
„Да, но видете, тој им е претпоставен и секогаш мора да постои образложение за тоа, бидејќи не можете вие да дозволите, како организирана држава, да давате сертификат – државна тајна, како што јас сум го имал тој сертификат од позиција на претседател на собраниска комисија за одбрана и безбедност, а подоцна да ви се случуваат вакви феномени каде што нема да добиете. Вие имате денеска луѓе во Владата, на високи одговорни функции, па и на полето на безбедноста, кои до ден-денеска немаат добиено ваков сертификат и треба да се побара официјален одговор. Едноставно, голем број високи воени старешини не се стекнаа со овој сертификат. Зошто – треба да се прашаат тие коишто го издаваат или, пак, лично тој на којшто не му е доделен“.
На прашање – зошто на настанот видливо отсуствуваше уставното име на државата, Димитриевски кажа дека иако Република Северна Македонија е официјално држава, никој договор не забранува да се користи Макеоднија и додава – никој на Македонецот не може да му го искорени името Макеоднија од самиот себеси.
ИЗВОР: 360stepeni.mk
