ГАЗА (АА) – Израелската војска продолжува да бомбардира делови од Појасот Газа, додека палестинската енклава се соочува со хуманитарна криза, пренесува Анадолу.
Очевидците изјавија дека голем број луѓе загинале, а припадници на екипите на цивилна заштита и на итна помош се ранети додека се обидувале да се пробијат до улицата Ал-Џала во Газа за да ги спасат повредените.
Животот го загуби една жена, а шест деца се ранети во израелското бомбардирање на подрачјето Кизан ан-Наџар во Кан Јунис, јужно од градот Газа, изјавија медицински извори.
Израелската војска започна интензивни напади врз Зајтун и Шуџаја, источни квартови на градот Газа, како и врз неговите северозападни делови, изјави очевидец.
Бомбардиран е и квартот Ал-Туфах во североисточна Газа, каде што има човечки жртви.
Бомбардирани се и главните патишта во Појасот Газа.
Најмалку 2.670 лица загинаа во израелските напади на блокираниот палестински Појас Газа од 7 октомври досега.
Во израелските напади на Газа ранети се најмалку 9.600 Палестинци.
