реклама
Анкетната комисија за скандалот со Клиниката за онкологија ја одржа својата прва седница на која пратениците преку утврдување на хронологијата на настаните ќе испитуваат дали има политичка одговорност во овој случај и дали биле загрозени основните човекови права на пациентите кои се лекувале. Први на распит се поранешните министри за здравство Венко Филипче и Беким Сали. Рашела Мизрахи пратеничка од ВМРО-ДПМНЕ која е претседател на Комисијата рече дека очекува да бидат донесени заклучоци за вистината, дали има или нема одговорност и ако има, чија е таа.
„Нема да дозволам оваа Анкетна комисија да се претвори во парасудски орган. Ние сме пратеници и политичари кои што согласно одлуката ќе бараат политичка одговорност со чинење или со нечинење за таканаречениот популарно наречен скандал на Онкологија, кој што во суштина сите ние знаеме дека е трагедија. Јас искрено се надевам и верувам дека ова ќе биде првата Анкетна комисија која што ќе ја заврши задачата која што е утврдена со одлуката ќе утврди наоди и ќе предложи решенија“, вели Рашела Мизрахи.
реклама
Ненад Коциќ пратеник од СДСМ вели дека нивната пратеничка група застануваат целосно против злоупотребата на биолошката терапија и бара јасно со име и со презиме да се каже кој е одговорен за овој случај.
„Нашата работа би требало да прати порака и за луѓето во иднина дека не смеат да си дозволуваат на било кој начин да биде злоупотребена функцијата или положбата притоа нарушувајќи ги законите и уште полошо нарушувајќи го здравјето или животот на нашите сограѓани. Било кој што злоупотребил функција или положба без разлика како се вика или од која политичка партија доаѓа треба да биде таргетиран“, вели Ненад Коциќ.
реклама
Со сличен став е и Арбен Зибери од ДУИ. Иако, како што вели тој, комисијата не е судски орган која ќе носи пресуди, сепак ќе се бара политичка одговорност за овој случај, но воедно повика расправата во оваа Комисија да не се користи за политички маркетинг.
„Да не гледаме секоја политичка партија да добива политички поени зашто се работи за здравјето на луѓето, се работи за здравствен проблем. Би било најсоодветно и најдобро сите да придонесеме да се најдат, ако постојат виновници, за наводните злоупотреби кои што веќе беа во јавноста пласирани“, порача Арбен Зибери.
реклама
Во скандалот со Клиниката за онкологија беше обелоденето дека цитостатската терапија за болните од канцер била крадена и препродавана на црно. По ова јавноста се крена на нозе а веќе неколку пати граѓаните одржаа масовни протести пред Влада со барање за одговорност.
реклама
