МОСКВА (АА) – Министерството за одбрана на Русија соопшти дека се спречени украински напади со беспилотни летала на подрачјата на Москва и Брјанск, јавува Анадолу.
Во соопштението на Министерството се наведува дека украинските сили во текот на ноќта се обиделе да ја нападнат руската територија со беспилотни летала.
Се додава дека руските сили со системот за противвоздушна одбрана собориле две беспилотни летала во воздушниот простор на Брјанската Област.
Во соопштението се истакнува и дека утринава околу 04:30 часот бил спречен обид на украинските сили за напад на Московската Област.
Се додава дека беспилотното летало е уништено во воздушниот простор на градот Љуберци.
Градоначалникот на Москва, Сергеј Собјањин, на својот профил на социјалните мрежи објави дека нема загинати или предизвикана материјална штета по соборувањето на беспилотното летало што се движело во правец на Москва.
Аеродромите „Внуково“ и „Домодедово“ во Москва продолжиле со работа еден час по привремениот прекин на полетувањата и слетувањата.
