АТИНА (АА) – Во Грција, каде што двајца млади загинаа во последните две години во навивачки немири, актуелната Влада меѓу главните приоритети ја вклучи борбата против хулиганството, но опозицијата сè уште ја критикува Владата дека не прави доволно во овој поглед, јавува Анадолу.
Убиството на 19-годишниот Алкис Кампанос во Солун ноќта на 1 февруари 2022 година, кога беше убиен од навивачи на противничкиот тим, предизвика жестоки реакции во грчката јавност. Потоа, на 7 август годинава, 29-годишниот навивач на АЕК, Михалис Кацурис, беше убиен при тепачка што изби во атинската населба Неа Филаделфија меѓу навивачите на грчки АЕК и хрватски Динамо од Загреб.
Смртта со нож на Кацурис го врати прашањето за насилството во спортот на агендата на грчката Влада.
Грчкиот премиер Киријакос Мицотакис потоа во Атина беше домаќин на претседателот на УЕФА Александар Чеферин, а тој разговараше и за мерките што може да се спроведат за борба против хулиганството во спортот со челниците на четирите најголеми фудбалски клубови во Грција – АЕК, Панатинаикос, Олимпијакос и ПАОК.
По разговорите, Владата ги презентираше планираните мерки што треба да се преземат во борбата против хулиганството, кое Чеферин го опиша како „рак на фудбалот“.
Како дел од новите одлуки, најавено е дека ќе биде дозволено максимум по една навивачка група за секоја екипа, дека ќе се забрануваат неовластени навивачки групи и дека на трибините ќе влегуваат нумерирани навивачки групи.
Најавено е дека ќе се врши полициска контрола и идентификација на навивачките групи кои предизвикуваат проблеми на влезовите, а ќе се оствари и соработка со другите европски земји во борбата против насилството во спортот.
Беше истакнато дека доколку има потреба, може да се преземат и други мерки, како што е затворање на влезовите/излезите на стадионите што ги користат групи навивачи кои направиле проблеми и недозволување на екипи чии симпатизери прават проблеми да учествуваат на европските натпреварувања.
– Потрага по одговорните –
На заедничката прес-конференција со Чеферин, Мицотакис призна дека полицијата не направила доволно во вистинскиот чин на насилство во населбата Неа Филаделфија и истакна дека Владата е свесна за сите недостатоци.
Во меѓувреме, започнати се активности за откривање на одговорните во полицијата, а седум лица се суспендирани од службена должност.
Министерот за заштита на граѓаните, Јанис Иконому, изјави дека и други лица во полициската служба чија одговорност ќе биде утврдена, ќе бидат суспендирани од должност.
Полицијата меѓутоа сѐ уште не успеа да го идентификува убиецот на Кацурис. Во истрагата за бунтот и тепачката на навивачите што резултираше со смрт на Кацурис, истражен притвор е утврден за вкупно 105 навивачи, 102 хрватски и тројца грчки државјани.
– Немири во Неа Филаделфија –
Грчката полиција со официјално соопштение ден по инцидентот во Неа Филаделфија соопшти дека во немирите загинало едно лице, а осум се повредени.
Во соопштението се наведува дека од 100 до 120 навивачи на Динамо Загреб со камења и стапови се степале со навивачите на АЕК во соработка со некои грчки фудбалски навивачи.
Во грчките медиуми, дозволувањето на група од 100 луѓе, составена од навивачи на хрватскиот тим, да минат низ грчката граница со приватни автомобили и да влезат во просторот каде што ќе се игра натпреварот, се протолкува како безбедносно нарушување, иако беше познато дека навивачите на Динамо нема да смеат да присуствуваат на натпреварот против АЕК.
Полицискиот аналитичар Ставрос Баласкас во разговор за ТВ-каналот „ANT1“ изјави дека хулиганите на загрепски Динамо биле во контакт со хулиганите на Панатинаикос пред да пристигнат во Атина.
– Реакција на опозицијата –
Опозицијата ја обвини Владата дека не е во состојба да го спречи насилството во спортот, особено инцидентот во Неа Филаделфија, и го критикуваше министерот Иконому затоа што не поднесе оставка по инцидентот.
Главната опозициска партија, Алијансата на радикалната левица (СИРИЗА), во соопштението рече дека неуспехот да се спречи чинот на насилство што резултираше со смрт на Кацурис е вистинско фијаско.
За премиерот Мицотакис рекоа дека „не го придавал потребното значење на фактот што 200 неонацистички хулигани од Хрватска непречено поминале половина Грција, по што се случило трагичното убиство на млад човек“.
Панхеленското социјалистичко движење (PASOK) исто така упати критики до власта, тврдејќи дека не се применуваат законите во борбата против хулиганството и дека не е јасно до кој степен може да се применат новонајавените мерки. ПАСОК нагласи дека насилниците во спортот треба доживотно да се држат настрана од спортските натпревари.
Комунистичката партија на Грција (KKE) во соопштението наведува дека мерките за борба против хулиганството биле усвоени и од претходните влади, но дека овие мерки не дале никаков резултат бидејќи прашањето не било спречено во корен.
