(ФОТО) Плоштадот „Скендербег“ претворен во ѓубриште по синоќешната прослава за годишнината од Рамковниот договор

Различно ѓубре и пластична амбалажа се расфрлани на локацијата на која вчеравечер се одржа концерт по повод 22-годишнината од Охридскиот рамковен договор

И годинава тендерот за организацијата на прославата, распишан од Министерството за политички систем со кое раководи Артан Груби (два договора во вкупен износ од сто илјади евра) го доби „Арбериа дизајн“, позната по тоа што во континуитет добива јавни набавки од институции со кои раководат кадри на ДУИ

Црвено-бели ленти врзани по бандерите и оградите, остатоци од нив разлетани насекаде, преполни канти и контејнери претворени во мали депонии, расфрлано ѓубре во кое доминираат пластични шишиња. Ваква е глетката денеска претпладне на плоштадот „Скендербег“ во Скопје – место на кое синоќа се одржа централниот настан за одбележување на годишнината од потпишувањето на Рамковниот договор. Дел од ѓубрето е собрано на купчиња, но автомобилите што се паркираат го газат и го разнесуваат.

За организирање на настаните за одбележување на годишнината и годинава беше задолжено Министерството за политички систем со кое раководи првиот вицепремиер Артан Груби, кој, пак, случувањата кај „Скендербег“ во живо ги пренесуваше на Фејсбук.

И годинава тендерот за организацијата на прославата за Рамковниот договор, распишан од Министерството за политички систем на Груби (два договора во вкупен износ од сто илјади евра) го доби „Арбериа дизајн“, фирма позната по тоа што во континуитет добива јавни набавки од институции со кои раководат кадри на ДУИ.

Покрај хотелски, кетеринг и други услуги, на „Арбериа“, според договорите и понудите, треба да ѝ бидат исплатени 300 илјади денари за концепт за организирање на настанот, како и 290 илјади денари за стихотворба од реномиран поет, музички аранжман и аудиозапис на песна по повод годишнината. За видеоспот за песната се предвидени околу 4 000 евра, а за спот за постигнувањата на Рамковниот договор се издвоени 6 000 евра.

Тетовската фирма и лани беше задолжена за манифестацијата кога од државниот буџет ѝ беше на располагање иста сума – сто илјади евра. И лани меѓу ставките во договорот беа стихотворба и песна за Рамковниот договор.