Главни актери од украинска страна, и во нивните и во руските извештаи, се германските Леопард 2 и американските Бредлија кои најголемо внимание добија во поразите што ги претрпеа на фронтот.
„Она што допрва треба да го видиме, барем од независни извори, е каков било доказ за Челенџер 2 во акција. Тие секако можеби до сега успеале да преживеат недопрени, но чисто се сомневам. Тие се идентично ранливи на мини и дронови како оние што уништија некои од Леопардите,“ пишува британскиот потполковник, Стујарт Крафорд.
Крафорд објаснува дека веќе во јавност има снимки од други британски борбени возила како Алвис стормер кој носи ХВМ проектили „и се покажа успешен против руските хеликоптери“ и оклопниот Мастиф од кого има уништени примероци на военото поле.
„Но се уште нема никаков знак од Челенџер 2. Репортерот на Би-би-си од Украина, Џонатан Бил, неодамна на Твитер напиша дека прашал двајца украински генерали задолжени за операциите, каде се наоѓаат тенковите и тие му одговориле дека се уште ги немаат. Мора да се на некое друго место, се уште да не се распоредени,“ пишува Крафорд.
Тој признава дека ова ништо не значи бидејќи тенковите може да се дел од единиците кои се уште не се извадени на фронтот, дополнувајќи подоцна дека добил информација дека тие се на обука со падобранските формации, кај кои исто така се распоредени и американски Страјкер и германски Мардер, кои исто така се уште не се видени во борба.
Порачувајќи дека не треба да се залажуваат дека 14 Челенџери нешто значително смениле во украинските воени капацитети, Крафорд се врти и кон слабостите на својата армија:
„Треба да запаметиме и дека британската донација го намали нашиот патетично мал број на тенкови кои можат да бидат распоредени на 134, плус уште едвај една дланка други кои се на обука или на тестирање. Ова е далеку премалку за држава која сака да биде признаена како регионална (европска) воена сила, а да не зборуваме за глобална.
Треба да гледаме да имаме флота од околу 500; сè што е помалку од тоа и нашите оклопни единици нема да бидат доволни за тип на војна каква што гледаме во Украина.
Како што напишав и претходно сегашните 134 тенкови може да ни траат една седмица, ако имаме среќа.
Работите нема да се подобрат ни кога Челенџер 3 ќе ги замени нашите постари тенкови. Планерите размислуваат за флота од 148 тенкови кои би можеле постепено да влегуваат во служба по 2027, иако искуството покажува дека е многу поверојатно тоа да е 2030,“ порачува британскиот потполковник.
ИЗВОР: off.net.mk
