На граѓаните не им се препорачува да се движат со чадори или други метални предмети во рацете, а се апелира да не бидат во близина на згради, високи дрвја, кабли итн.
Министерството за внатрешни работи (МВР) на Србија, врз основа на прогнозите од Републичкиот хидрометеоролошки завод за вечерва и утре, издаде предупредување до граѓаните за силно невреме проследено со ветрови и обилни врнежи, удари од гром и можност за паѓање град.
Се апелира до граѓаните да се придржуваат до пропишаните мерки, односно да ги отстранат сите предмети кои би можеле да паднат од силниот ветар и да предизвикаат материјална штета или да повредат некого.
Се предупредуваат граѓаните и да ги затворат сите врати, како и да избегнат контакт со чешмите во кујните и бањите, радијаторите и други метални предмети.
Доколку граѓаните се најдат на отворено, МВР порачува дека е потребно да не бидат во близина на дрва и високи објекти за да се избегне опасноста да бидат повредени.
„Важно е да се избегнуваат високи конструкции – високи дрвја, огради, телефонски кабли и електрични водови. Потребно е да се скриете во зграда или автомобил, а доколку тоа не е можно, седнете на земја и избегнувајте стоење во близина на згради“,
гласи дел од предупредувањето.
За оние кои се наоѓаат во шума, препорачливо е да застанат под ниски дрвја, а не под високи и дрвја кои се „осамени“ односно на отворено.
На граѓаните не им се препорачува да се движат со чадори или други метални предмети во рацете.
Невремето се очекува во доцните попладневни часови односно вечерва да ја зафати Србија, откако во Хрватска веќе остава пустош зад себе. Силни штети претходно во текот на денот беа направени и во Италија.
Пред два дена, и Србија и Хрватска беа погодени од силно невреме кои направи огромни материјални штети. Хрватските власти регистрираа и четири човечки жртви, а по една беше регистрирана и во Словенија и во Босна и Херцеговина.
Извор: 360stepeni.mk
