На средба со генералниот секретар на НАТО Јенс Столтенберг , српскиот претседател Александар Вучиќ побарал НАТО да ја преземе контролата и да обезбеди пристоен живот за Србите на Косово, пренесуваат српските медиуми. Вучиќ од Брисел порачал дека КФОР е единствена институција која нешто прави за смирување на тензиите и дека заеднички именител на денешните средби е желбата што побрзо да се дојде до деескалација на односите.
„Се плашам дека не сме на патот кој би ни гарантирал сигурност и безбедност, но верувам дека ова наше барање или барање до НАТО ќе вроди со плод или со нивно поголемо внимание. Сигурен сум дека не сакаат Србите да бидат протерани од нивните вековни огништа,“
изјавил Вучиќ од Брисел.
Како што објави Н1, Вучиќ истакнал дека е потребна поголема соработка со НАТО и КФОР, а на средбата со Столтенберг имало многу конкретни пораки.
„Изјавата на Курти не е само проблематична во делот во кој тој го најавува новиот прогон на Србите, туку има многу поголем правен проблем, а тоа е дека според резолуцијата 1244 на ОН, ОВК или нешто слично на неа не може да постои на Косово, а Курти самиот вели дека косовската полиција е наследник на ОВК и тоа не може да постои,“
потенцирал српскиот претседател.
Во однос на извештајот што специјалниот американски пратеник за Западен Балкан, Габриел Ескобар, го претстави пред Комисијата за надворешни работи на Претставничкиот дом на Конгресот, Вучиќ нагласи дека извештајот е многу подобар од пред два месеци.
„Кога можевте да слушнете подобар извештај во американскиот конгрес за прашањето за Косово и Метохија, кога точно од 1995 година? Па, никогаш, се разбира. Кога можевте да слушнете за овие години дека Србија не е единствениот виновник,“
изјавил Вучиќ.
Извор: 360stepeni.mk
