Во октомври турскиот парламент ќе одлучува за влез на Шведска во НАТО

Ердоган рече дека очекува Шведска да преземе конкретни чекори против тероризмот во согласност со нивниот договор, додавајќи дека Стокхолм ќе поддржи и измена на царинскиот договор на Турција со Европската Унија, како и безвизен режим

Турскиот претседател Реџеп Таип Ердоган денеска изјави дека ќе ја проследи ратификацијата на кандидатурата на Шведска за НАТО до парламентот наесен по завршувањето на летниот одмор, додавајќи дека очекува Стокхолм да преземе некои чекори против тероризмот во замена за ратификација.

Анкара со месеци ја одложуваше ратификацијата, обвинувајќи ја Шведска дека прави премалку против луѓето што ги смета за терористи, од кои повеќето се членови на забранетата Курдистанска работничка партија (ПКК). Но, во неочекуван пресврт, Ердоган во понеделникот се согласи да го проследи барањето за прием на Шведска во НАТО до парламентот.

Летниот одмор во турскиот парламент започнува на крајот на неделата, а повторно ќе се состане во октомври.

„Кога повторно ќе се отвори, верувам дека нашиот претседател на парламентот ќе го стави ова на гласање помеѓу меѓународните договори. Примарното место на одобрување е парламентот, а потоа ќе дојде кај мене на одобрување. Сакаме овој процес да заврши што е можно поскоро“,

рече Ердоган на прес-конференција по самитот на НАТО во Вилнус.

Ердоган рече дека очекува Шведска да преземе конкретни чекори против тероризмот во согласност со нивниот договор, додавајќи дека Стокхолм ќе поддржи и измена на царинскиот договор на Турција со Европската Унија, како и безвизен режим.

Исто така, висок функционер ви изјава за Ројтерс рекол дека владата на Ердоган ќе разговара со својот националистички сојузник во парламентот за ратификување на пристапот на Шведска во НАТО, откако се чини дека Партијата за националистичко движење (МХП) зазеде негативен став по ова прашање.

Лидерот на МХП Девлет Бахчели вчера изјави дека Шведска не успеала да се огради од тероризмот, но додаде дека Ердоган ќе ја донесе конечната одлука за шведската кандидатура.

Партијата на правдата и развојот (АКП) на Ердоган без МХП го нема парламентарното мнозинство потребно за ратификација. Останатите партии во парламентот не кажаа дали ќе ја поддржат ратификацијата.

Фото: EPA-EFE/TIM IRELAND