Градоначалникот на Кисела Вода, Орце Ѓорѓиевски, реагира дека градоначалничката на Град Скопје, Данела Арсовска, немала надлежност да го казни за одложувањето на отпад пред депонијата „Дрисла“ бидејќи јавното претпријатие се наоѓа на територија на Општините Студеничани и Сопиште
На прес-конференцијата, Ѓорѓиевски кажа и дека се кае за тоа што и дал поддршка на Арсовска на локалните избори во 2021 година
Откако доцна синоќа во медиумите излезе вест дека градоначалничката на Град Скопје, Данела Арсовска, го казнила градоначалникот на Општина Кисела Вода, Орце Ѓорѓиевски, со парична казна во износ од 90 000 евра поради оставање отпад пред портите на депонијата „Дрисла“, денеска на прес-конференција тој за оваа казна рече дека нема правна основа бидејќи ѓубрето било истурено пред објект кој се наоѓа на територија на Oпштината Студеничани, а не во Град Скопје, што значи дека таа немала ингеренции за казнување за овој случај.
„Ниту си ги знае своите надлежности ниту, пак, своите ингеренции и што е најстрашно, според мене, ниту, пак, знае која е територијата што ја администратира“,
рече Ѓорѓиевски.
Покрај Кисела Вода, казна била пишана и за Општината Сопиште, а доколку се соберат двете казни кои треба да ги платат општините – сумата изнесува околу 140 000 евра, но тие се уште не се пристигнати на адреса на општините. Ѓорѓиевски кажа и дека според негови информации, инспекторите кои ја напишале казната биде уценувани директно од градоначалничката.
Ѓорѓиевски вели дека за да го истурат сметот во „Дрисла“ нема потреба од никаков договор бидејќи според одлука која е донесена уште од 2005 г. сите општини се наведени дека може да одлагаат отпад со мерење на отпадот и врз основа на тоа да им се наплати, а одлуката да ги преземат работите во свои раце и да започнат со чистење на општините, ја правда со тоа што доколку градоначалниците не постапеле, градот ќе продолжел да тони во смет и здравјето на граѓаните би се довело во прашање.
„Знаете дека по неколкудневно нечистење на сметот и претворање на градот во една голема депонија, ние како општини со помош од наши колеги излеговме на терен да се справивме со проблемот кој го создаде Данела Арсовска, КХС и Градот Скопје, земајќи во предвид дека нашите сограѓани плаќаат за тоа“,
вели Ѓорѓиевски.
Ѓорѓиевски кажа и дека се кае што воопшто и дал поддршка на Арсовска во предизборната кампања за локалните избори во 2021 г. но и дека тој ретко може да ја види неа на терен да се пофали со некој завршен проект, а единствено излегува на прес-конференции за да се расправа со други луѓе.
Тој потенцираше дека Арсовска не смее да постапува на места каде што нема ингеренции и најави реакција од неговиот правен тим, не исклучувајќи ја можноста да поднесе кривична пријава за неа поради загрозување на здравјето на граѓаните
„Таа може да стане утре и да влезе во филм дека е министер за внатрешни работи па да почне да казнува народ по улици и да апси народ. Таа нема капацитет, не знае да се справи со проблемите ниту ја знае територијата со која администрира“,
кажа Ѓорѓиевски.
