ИСТАНБУЛ (АА) – Украинскиот претседател Влaдимир Зеленски изјави дека оние што го избираат „патот на злото“ се уништуваат сами себе, коментирајќи ги неодамнешните судири меѓу Русија и паравоената група „Вагнер“, јавува Анадолу.
„Секој што го избира патот на злото, се уништува себеси. Праќа колони војници да ги уништат животите на друга земја и не може да ги спречи да бегаат и да изневеруваат кога животот се спротивставува“, рече Зеленски во изјавата објавена на Телеграм.
Зеленски рече дека рускиот претседател Владимир Путин „ги презира луѓето“ и фрлил стотици илјади во војната во Украина само за „на крајот да се забарикадира во Московскиот Регион од оние што тој самиот ги вооружува“.
Зеленски понатаму рече дека Русија користела „пропаганда“ за да ги „маскира својата слабост и глупоста на нејзината влада“, но дека „ниту една лага не може да го скрие тоа“ сега поради големиот хаос што владее.
„Слабоста на Русија е очигледна. Целосната слабост. И колку подолго Русија ги држи своите војници и платеници на наша земја, толку повеќе хаос, болка и проблеми ќе има за себе подоцна. Ова, исто така, е очигледно“, нагласи Зеленски.
Путин го обвини шефот на „Вагнер“, Евгениј Пригожин, за „предавство“ откако борците од регионите во Украина под руска контрола влегоа во рускиот град Ростов рано утрово.
Тензиите меѓу Москва и паравоената група се зголемија откако Пригожин ги обвини руските сили дека ги напаѓаат неговите борци.
Русија доцна синоќа ги негираше тие тврдења и издаде наредба за апсење на Пригожин.
Пригожин последните месеци континуирано ја обвинуваше Русија дека не ѝ испорачува доволно оружје на паравоената група што се бореше заедно со руската армија во Украина.
Извор: www.aa.com.tr
