За тензиите на северот на Косово ќе се разговара и на состанокот на министрите за надворешни работи на земјите членки на ЕУ, кој ќе се одржи на 26 јуни во Луксембург
На претстојниот самит на 29 и 30 јуни, лидерите на земјите членки на Европската Унија (ЕУ) ќе повикаат на итна деескалација на ситуацијата на северот на Косово, објави регионалниот сервис на Радио Слободна Европа, повикувајќи се на нацрт-заклучоците кои ги поседува, а кои треба да бидат усвоени на самитот.
Според документите на кои се повикува медиумот, дваесет и седумте шефови на држави и влади на Европската Унија треба да ги осудат инцидентите на северот на Косово и да повикаат на итна деескалација на ситуацијата.
„Како следен чекор, потребно е: продолжување на дијалогот со посредство на ЕУ предводен од високиот претставник Жозеп Борел и брзо спроведување на Договорот за патот кон нормализација и неговиот анекс за имплементација. Неуспехот на деескалацијата на тензиите ќе има негативни последици“,
се наведува во нацрт-заклучоците кои шефовите на држави и влади на земјите членки на ЕУ треба да ги усвојат на крајот од самитот на 29 и 30 јуни.
За тензиите на северот на Косово ќе се разговара и на состанокот на министрите за надворешни работи на земјите членки на Европската Унија кој ќе се одржи на 26 јуни во Луксембург.
Извор: 360stepeni.mk
