ИСТАНБУЛ (АА) – Израелските сили приведоа 5 палестински рибари во близина на брегот на Појасот Газа, кој е под блокада, пренесува Анадолу.
Во веста на официјалната палестинска новинска агенција ВАФА се нагласува дека силите на израелската морнарица изутрината интервенирале врз рибарите кои ловеле риба на отворени води кај Газа.
Во оваа вест се истакнува дека израелските сили привеле 5 палестински рибари и им ги заплениле чамците, и дека израелската морнарица секој ден како цел ги има рибарите кои ловат на отворени води кај Појасот Газа.
Се вели дека палестинските рибари се во ситуација да не можат да ловат риба во морето кај Газа поради континуираните интервенции на израелските сили.
– Прекршувањата на Израел врз палестинските рибари во Газа
Израел од 2006 година од копно, море и воздух го блокира Појасот Газа, кој е дом на околу 2 милиони Палестинци.
Според палестинското Министерство за земјоделство, риболовот е едно од главните средства за живот во Газа, каде што има околу 4.000 рибари.
Според извештаите за човекови права, Израел честопати приведува рибари во Газа и им ги запленува чамците. Владата на Тел Авив, исто така, периодично го намалува риболовното растојание на рибарите во Појасот Газа.
Според Договорот од Осло, потпишан меѓу Палестинската ослободителна организација и Израел во 1993 година, Палестинците имаат право слободно да се движат до 20 милји од Појасот Газа без да бидат подложени на какво било мешање на Израел, но израелската Влада ги спречува палестинските рибари да го уживаат тоа право.
Извор: www.aa.com.tr
