Ново апсење во Србија за масакрот кај Младеновац

Братучедот е уапсен врз основа на нови околности до кои дошла истрагата, а кои се однесуваат на потеклото на оружјето, куршумите и експлозивните средства што осомничениот Урош ги користел при масовното убиство и кои биле пронајдени при претресите што следуваа подоцна

Четврто лице е уапсено во рамки на истрагата за масакрот кај Младеновац што се случи на 5 мај, а во кој осум лица беа убиени и имаше десетина ранети.

За масовното убиство е осомничен 21-годишниот Урош Б., а вчера, како што денеска објавија српските медиуми, е уапсен неговиот прв братучед со иницијали Б. Г. (син на вујкото на осомничениот).

Во тек е неговото сослушување во Вишото јавно обвинителство во Смедерево и тој е осомничен за кривично дело недозволено производство, држење, носење и пуштање во промет оружје и експлозивни материи.

РТС пренесува дека Б. Г. е уапсен врз основа на нови околности до кои дошла истрагата, а кои се однесуваат на потеклото на оружјето, куршумите и експлозивните средства што осомничениот Урош ги користел при масовното убиство и кои биле пронајдени при претресите што следуваа подоцна.

Покрај братучедот, претходно српските органи ги уапсија и таткото и вујкото на Урош Б., кои исто така се осомничени за недозволено производство, држење, носење и пуштање во промет оружје и експлозивни материи.