ИСТАНБУЛ (АА) – По разорувањето предизвикано од силните земјотреси кои на 6 февруари ја погодија Јужна Туркије, историскиот турски град Антакија, познат во античко време како Антиохија, презема обемни напори за обнова и реставрација, јавува Анадолу.
„Ова е процес што ќе потрае најмалку 10 години или можеби повеќе“, рече Јахја Џошкун, заменик-генерален директор на Културното наследство и музеи на Туркије, за време на панел-дискусијата во Истанбул.
„Со цел да се направи градот попогоден за живеење и да се мотивираат луѓето да се вратат, верските објекти, како што се историската џамија Улу, црквите и џамијата Хабиб-и Некар ќе бидат повторно изградени или обновени на местата каде што стоеле со векови“, изјави Џошкун на панелот насловен „Земјотресот на 6 февруари и нашето уништено наследство: Сведоштво на очевидци“.
Земјотреси со јачина од 7,7 и 7,6 степени, со епицентар во областа Кахраманмараш, погодија повеќе од 13 милиони луѓе во 11 области во јужна и југоисточна Туркије и однесоа повеќе од 50.000 животи.
„Туркије веќе почна да работи на овие објекти“, изјави Џошкун, додавајќи дека процесот на обнова и реставрација на овие објекти ќе трае околу шест месеци до една или две години.
„Ние, всушност, зборуваме за обнова на градот“, појасни тој, додавајќи дека поради оваа причина, градот ќе биде модерен, но, исто така, ќе ги задржи и врските со реалноста и автентичноста, како и со својата историска текстура.
Според Џошкун, целиот процес ќе биде заеднички напор што ќе го вклучи турското Министерство за животна средина, урбанизам и климатски промени, Министерството за култура и туризам, како и некои универзитети, меѓу кои и Универзитетот „Хатај“ и Блискоисточниот технички универзитет со седиште во Анкара, како и локалните заедници во регионот заедно со невладините организации.
Истакнувајќи ја разновидната сопственост на зградите и земјиштето во регионот, вклучително министерствата, приватните имоти, фондациите и јавните институции, Џошкун изјави: „Ќе им дадеме директна поддршка и финансиска помош на оние структури што бараат итно внимание.“
Министерството ќе преземе сеопфатна реставрација во одредени области, понекогаш грижејќи се за целиот процес или само обезбедувајќи одредена техничка поддршка.
Џошкун го спомена и активниот ангажман на Туркије со различни меѓународни организации од голем број земји, вклучително Јапонија, Британија и САД.
„Очекуваме соработка со одредени организации, ангажирање во техничка соработка со некои, додека добиваме финансиска поддршка од други“, додаде тој, истакнувајќи ја флексибилноста и приемливоста на понудите од овие глобални партнери.
Извор: www.aa.com.tr
