КАРТУМ (АА) – Најмалку 17 цивили загинаа во судирите во јужниот дел на главниот град на Судан вчера, соопштија медицински лица додека продолжуваат борбите меѓу суданката армија и паравоените сили, јавува Анадолу.
Во денешното соопштение Суданскиот лекарски синдикат истакна дека областа Мајо била сведок на силно гранатирање доцна претходната ноќ, при што биле повредени најмалку 106 лица, од кои на 36 им била потребна хируршка интервенција.
Бројот на загинати би можел да биде поголем поради продолжувањето на гранатирањето во главниот град Картум, кој со недели е место на судири меѓу армијата и паравоената група сили за брза поддршка (РСФ).
„Медицинскиот персонал во болницата ‘Башаер’ беше под голем притисок во справувањето со случаите поради нивниот голем број и недостигот на медицински персонал“, се додава во соопштението и се повикуваат останатите лекари и медицинскиот персонал „да помогнат“.
Во судирите што избувнаа во Судан од 15 април загинаа најмалку 863 цивили, а илјадници се повредени, соопшти Суданскиот лекарски синдикат.
Меѓународната организација за миграции (ИОМ) проценува дека повеќе од еден милион луѓе се внатрешно раселени поради судирите.
Завојуваните ривали во Судан во понеделникот се согласија да го продолжат седумдневното примирје, со посредство на Саудиска Арабија и САД, за уште пет дена.
Во последните месеци се појавија несогласувања меѓу армијата и РСФ околу интеграцијата на паравоената група во вооружените сили, клучен услов за транзицискиот договор на Судан со политичките групи.
Судан е без функционална влада од октомври 2021 година, кога војската ја собори преодната Влада на премиерот Абдула Хамдок и прогласи вонредна состојба, потег што политичките сили го квалификуваа како „државен удар“.
Транзицискиот период на Судан, кој започна во август 2019 година по соборувањето на претседателот Омар ал-Башир, требаше да заврши со избори на почетокот на 2024 година.
Извор: www.aa.com.tr
